İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 237 Hüküm no: 259 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Nikola v. Samil’in, Kapamacı Badesar v. Donik’den alacağını taksit taksit almaya razı olduğu Ma‘rûz Hâmil-i arzuhâl Sarrâf Nikola v. Samil nâm zimmî meclis-i şer‘-i şer‘-i şerîf-i enverde Kapamacı Badesar v. Donik nâm zimmî muvâcehesinde mersûm Badesar zimmetinde cihet-i karzdan hakkım olan üç yüz guruşun doksan sekiz buçuk guruşunu ceste be-ceste kabz edip bâkî iki yüz bir buçuk guruşu hâlâ zimmetinde olmağla taleb ederim deyü ba‘de’d-da‘vâ ve’l-ikrâr alâ mûcib-i ikrârihî meblağ-ı bakî-i mezkûru edâya ba‘de’t-tenbîh mersûm Badesar zimmî meblağ-ı mahkûmun bih mezkûru def‘aten edâya kudreti olmamağın târîh-i i‘lâmdan beher şehr on guruşdan meblağ-ı mezkûr iki yüz bir buçuk guruşu yirmi ayda müneccemen müdde‘î-i mersûma edâya ta‘ahhüd edip ve ber-minvâl-i muharrer müneccemen edâya emriyle Kapamacı Serkiz v. Agob ve Kigork v. Kazar nâm zimmîler dahî kefîl ve zâmîn olmalarıyla mersûm Nikola zimmî dahî râzı olduğu huzûr-ı âlîlerine i‘lâm olundu. Fî gurre-i Muharremi’l-harâm sene 1203.