İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 240 Hüküm no: 261 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in ikinci karısı Âişe Hatun’un evinden gasben alınan mal ve paralar konusunda Fesci es-Seyyid Mehmed ve kardeşi es-Seyyid İsmail ile ibralaştıkları Ma‘rûz Arzuhâl eden Ali Bey b. el-Hâc Osman meclis-i şer‘-i şerîf-i enverde zevcesi ma‘rifetü’z-zât Nefîse Hatun ile hemşîresi ma‘rifetü’z-zât Zeliha Hatun bt. Hüseyin hâzıralar oldukları hâlde derûn-ı arzuhâlde mezkûr Fesci Mağribiyyü’l-asl es-Seyyid Mehmed ve karındaşı es-Seyyid İsmail b. el-Hâc Ömer ile imâm vekîli Ali Efendi b. Osman mahzarlarında târîh-i i‘lâmdan iki gün mukaddem ben zevce-i uhrâm olup Üsküdar’da sâkin olan Âişe Hatun menzilinde olmamla mezbûrân es-Seyyid Mehmed ve es-Seyyid İsmail zevcem hâzıra-i mezbûre yanında ecnebî vardır deyü ihbâr ve beyne’l-işâyeyn imâm vekîli merkûm Ali Efendi ve kolluk neferâtı ve ahâlî ma‘iyyetleriyle Ebu’l-Vefâ mahallesinde sâkine olduğu menzile duhûl ve dolaba mahfûz mâlımdan yüz seksen dört guruş nakdim ile zevcem mezbûrenin on beş guruş kıymetli sırmalı püskül ve on iki guruş kıymetli altı değirmi yemenisini merkûmûn gasben ahz etmeleriyle nakd-i merkûm ve eşyâ-i mezkûrenin aynı mevcûd ise aynını müstehlek ise misl u kıymetini bi-tarîkı’z-zâmin ve menzilde ecnebî olmayıp mücerred merkûmânın haberleri garez-i nefsâniyelerinden nâşî olmağla mûcib-i şer‘îsini merkûmûndan taleb ve da‘vâ eylediğimizde anlar dahî ancak seksen beş buçuk guruş kabzlarını ikrâr ve meblağ-ı mezkûru bana teslîm ben dahî kabz edip mâ‘adâyı ba‘de’l-inkâr beynimize muslihûn tavassut edip da‘vâ-yı mezkûremizden bizi merkûmûn ile kırk guruş bedel-i makbûza ba‘de akdi’l-musâlaha ve’l-kabûl mâ‘adâya ve târîh-i kitâba gelince cemî‘ hukûk-ı şer‘iyyeye müte‘allika da‘vâdan her birimiz âharın zimmetini ibrâ’ ve kabûl eyledik deyü eyledikleri bi’l-cümle takrîr-i meşrûhunu her biri ba‘de’t-tasdîk merkûmûnun ba‘de’l-yevm müdde‘î-i mezbûr ve zevcesi merkûmeye ta‘addî etmeyeceklerine ahâlîden Molla Abdurrahman ve el-Hâc Hüseyin ve Dellâl Ahmed ve Berber Osman ve Ahmed Efendi ve Osman Ağa dahî kefîl oldukları huzûr-ı âlîlerine i‘lâm olundu. Fî 9 min Muharrem sene 1203.