İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 242 Hüküm no: 263 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mehmed Bey’in varislerinin, kendilerine intikal eden dükkanlara el koyan el-Hâc İsmail Ağa ile sulh yolu ile anlaşıp davalarından vazgeçtikleri Ma‘rûz Ser-kuyyûmcuyân-ı hâssa olup ordu-yı hümâyûnda arabacıbaşı iken bundan akdem vefât eden Mehmed Bey b. Mehmed’in zevce-i menkûha-i metrûkesi ve sulbî sagîr oğlu Mehmed Necmeddin Bey’in vâlidesi ve vasî-i mansûbesi ve zâtı ta‘rîf-i şer‘î ile mu‘arrefe olan derûn-ı arzuhâlde mezkûretü’l-ism Nâile Hânım bt. İsmail Ağa Harameyn-i muhteremeyn müfettişi müderrisîn-i kirâmdan fazîletlü es-Seyyid Abdülhalim Efendi ma‘iyyetiyle du‘âhânemizde ma‘kûd meclis-i şer‘-i enverde hâlâ ser-kuyumcuyân-ı hâssa sâhib-i arzuhâl el-Hâc İsmail Ağa b. Mustafa mahzarında zevcem mûrisim müteveffâ-yı mezbûr Mehmed Bey hayâtında kuyumcubaşı iken İstanbul’da Mahmudpaşa-yı Veli Câmi‘-i Şerîf ve civârında kuyumcubaşılara mahsûs kuyumcu kârhânesinin ittisâlinde olan na‘alband dükkânını kendi mâlıyla iştirâ ve mevcûd olan ebniyesinin ba‘zı mahâllini ta‘mîr ve dükkân-ı mezkûr arsa üzerine hâriciyede bir bâb ve dâhiliye olarak dahi kendi mâlıyla mülkü olmak üzere müceddeden binâ ihdâs ve ile’l-vefât tasarrufunda iken vefât eyledikde zikr olunan kuyumcubaşılık bâ-hatt-ı hümâyûn mezbûr el-Hâc İsmail Ağa’ya tevcîh olundukda hâriciyede olan oda ile dâhiliye olan mahalli bi’l-ırşi’ş-şer‘î bana ve sagîr-i mezbûra isâbet etmişken mezbûr el-Hâc İsmail Ağa kârhâne-i mezkûrenin mecmû‘ını zabt etmekle zikr olunan mahallerden kasr-ı yed veyâhûd ba‘de’l-keşf ve’t-takvîm iktizâ eden kıymetini bana teslîme mezbûr el-Hâc İsmail Ağa’ya tenbîh olunmak bi’l-asâle ve bi’l-vesâye matlûbumdur deyü da‘vâ eylediğimde mezbûr el-Hâc İsmail Ağa dahî cevâbında mukaddemâ bir bâb na‘alband dükkânını muhtevî olan mahâll-i mezkûr merhûm Mahmudpaşa-yı Velî Vakfı’na şehriye on akçe icârelü terbî‘an beş yüz zirâ‘ arsası olmağla mahâll-i mezkûrun icâre-i mü’eccelesi [73a] olan yüz yirmi akçe üzerine nef‘an li’l-vakf senevî dört yüz seksen akçe zam ve senevî altı yüz akçe mukâta‘a-i zemîn ile Hüdâvendigâr-ı sâbık merhûm ve mağfûrun leh Sultân Mustafa Hân -tâbe serâhu- hazretleri İstanbul’da Laleli Çeşme’de binâ buyurdukları câmi‘-i şerîf ve imâret-i âmireleri vakfına zam ve ilhâk ve vakf-ı hümâyûn tarafından bâ-izn-i mütevellî arsa-i mezkûre üzerine fevkânî bir oda ve kahve odası ve bir sofa ve kenîf ve abdesthâne ve dehliz ve başka nerdubân ve tahtında ahûr ve kenîfi müştemil kuyumcubaşılara mahsûs dâ’ire ve ittisâlinde kuyumculara tahsîs olunan fevkânî dört bâb oda ve odalarında dehlîz ve camlı bel tahtası ve tahtânî dört bâb kuyumcu odaları ve nerdübân tahtında kömürlük ve bir mikdâr havluyu ve tarîk-i âm tarafından bir bâb na‘alband dükkânını müştemil kârhâne müceddeden binâ olunup kuyumcubaşılara mahsûs olan dâ’irede kuyumcubaşı olanlar bilâ-icâre sâkin olup iktizâ eden cüz’î ve küllî ta‘mîrâtını mallarından teberru‘an li’l-vakf ta‘mîr eylemek ve zikr olunan fevkânî ve tahtânî sekiz bâb odalarda kuyumcu esnâfından sâkin olanlara icâre-i misli ile îcâr olunmak ve dükkân-ı mezkûr dahî icâr olunmak şartıyla zikr olunan kuyumcu kârhânesinin ebniye-i memlûkesini vakf ve şart eylemişdir deyip hâmiş-i arzuhâlde mastûr derkenârı ibrâz eyledikde ben müdde‘âmı isbâtdan âcize ve ol vecihle sulh sagîr-i mezbûr hakkında enfa‘ ve evlâ olmağla tasaddî eylediğim da‘vâmdan bâ-vesâtat-ı muslıhîn mezbûr el-Hâc İsmail Ağa ile nef‘an li’s-sagîr iki yüz elli guruş bedel-i makbûza sulh olup kârhâne-i mezkûrenin bi’l-cümle arsa ve ebniyesine müte‘allika âmme-i da‘vâdan mezbûr el-Hâc İsmail Ağa’nın zimmetini ibrâ’-i âm ile bi’l-asâle ibrâ’ ve iskât eyledim fîmâ ba‘d kârhâne-i mezkûrenin arsa ve ebniyesinde benim ve sagîr-i mezbûrun kat‘an alâka ve medhalimiz yokdur dedikde mezbûr el-Hâc İsmail Ağa dahi mukırra-i mezbûreyi tasdîk ve ibrâsını kabûl ve bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 9 min Muharrem sene 1203.