İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 243 Hüküm no: 264 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makos v. Bedros ile ortağı Seklon v. Arniyos’un sahip oldukları fırın ve değirmenlerde Emetullah Hanım’ın da hisselerinin olduğu Ma‘rûz Habbâzân tâ’ifesinden Makos v. Bedros ve şerîki Seklon v. Arniyos nâm zimmîler meclis-i şer‘-i şerîf-i enverde kethüdâları İsmail Ağa ve nizâm ustalarından Kadir Ağa ve Uncular Kethüdâsı Mustafa Ağa ve es-Seyyid Abdülvehhab Ağa ve Yiğitbaşı Molla Mehmed ve Süleyman Beşe ve es-Seyyid Abdurrahman ve Vartan ve Aleksan ve Filipos ve Ahram ve Bedros ve Kirkor ve Agob vesâ’ir mazbûtü’l-esâmî ustalar hâzır oldukları hâlde takrîr-i kelâm edip mahrûse-i Galata’ya muzâfa kasaba-i Fındıklı’da vâki‘ bir bâb değirmen ve ittisâlinde bir bâb habbâz fırını ve yine değirmen-i mezkûra merbût olup Büyükdere’de kâ’in bir bâb habbâz fırını ve bir bâb francala fırını ki cem‘an bir bâb değirmen ve üç bâb fırın derûnlarında mevcûd olup beyne’l-hıref gedik ta‘bîr olunur bargîr ve âlât-ı lâzıme-i ma‘lûme-i sâ’irenin otuz altı sehm i‘tibârıyla on sehmi Emetullah nâm hatunun ve on üçer sehmden yirmi altı sehmi bizim hücec-i şer‘iyye-i müte‘addide mûciblerince yedlerimizde mülklerimiz olmağla âlât-ı muharrere-i mezkûreler ber-minvâl-i [73b] muharrer başmuhâsebeye kayd olunup yedimize sûret verilmek murâdımızdır deyü eyledikleri bi’l-cümle takrîr-i meşrûhların hâzırûn-ı merkûmûndan her biri tasdîk ve husûs-ı mezkûrun istid‘âları vech üzre müsâ‘ade-i aliyyeleri erzânî buyurulmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 15 min Muharrem sene 1203.