İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 244 Hüküm no: 266 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan’ın evini gören el-Hâc İsmail’in yeni yaptırdığı pencerenin kapatılması ve yol tarafındaki saçağın oluğunun yenilenmesini talep ettiği Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Kâtib Mehmed Efendi hâssa mi‘mârlarından Hâfız İsmail ve Mustafa Halîfeler ile İstanbul’da Simkeşhâne kurbünde Sekbânbaşı Yakup Ağa mahallesinde vâki‘ zikri âtî menzile varıp cerîdede mazbûtü’l-esâmî Müslimîn huzûrlarında ba‘de akdi’l-meclis sâhib-i arzuhâl Molla Hasan b. Ömer nâm kimesne meclis-i ma‘kûd-ı mezkûrda menzili ittisâlinde tarîk-i hâsda iki bâb menzile mutasarrıf olan derûn-ı arzuhâlde mezkûrü’l-ism Haffâf el-Hâc İsmail b. Mehmed nâm kimesne muvâcehesinde mezbûr el-Hâc İsmail işbu mu‘âyene olunan menzillerini hedm ve binâ ettikde benim menzilin vüstâsında kâ’in sofanın tarîk-i hâs üzerine küşâd olunan bir aded pencere önüne duvar inşâ ve pencerenin nezâretini mesdûd etmek murâd eder mu‘âyene olunup men‘ ve ref‘ olunmak matlûbumdur deyü da‘vâ ol dahî cevâbında merkûm Molla Hasan tarîk-i hâs erbâbından olmayıp zikr olunan pencereyi benim rızâmsız küşâd ve ihdâs eylediğinden mâ‘adâ menzilimin makarr-ı nisvâna olan mahalline nezâreti vardır deyü def‘a tasaddî etdikde mevlânâ-yı merkûm mi‘mârân-ı mezbûrân ile ebniye ve sukûf ahvâline vukûf-ı tâmmı olan hâssadan bi’l-meclis cemâ‘at-i Müslimîn ile keşf ve mu‘ayene eylediklerinde fi’l-vâki‘ pencere-i mezkûrdan mezbûrun menzilinin makarr-ı nisvân olan mevâzi‘i görünüp zarar-ı bînî olduğunu müşâhade eyleyip pencere-i mezkûreyi kapanmakdan gayrı tarîkle def‘-i zarar mümkün olmamağla mevlânâ-yı merkûm müdde‘î-i mezbûr Molla Hasan’ı da‘vâ-yı mezkûresiyle mezbûr el-Hâc İsmail bî-vech-i şer‘î mu‘ârazadan ba‘de’l-men‘ mezbûr Molla Hasan tarîk-i hâs cânibinde kâ’in saçağın oluğunu tecdîd ta‘ahhüd eylediğini ketb ve tahrîr ve ma‘an meb‘ûs ümenâ’-i şer‘le meclis-i şer‘a gelip alâ vukû‘ihî inhâ ve takrîr eylediği İstanbul Mahkemesi’nden [74a] huzûr-ı âlîlerine i‘lâm olundu el-emrü li-veliyyi’l-emr. Fî 14 min Muharremi’l-harâm sene 1203.