İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 244 Hüküm no: 265 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevelli İshak Efendi’nin, es-Seyyid Hasan Efendi’de olan vakıf alacağını tahsil ettiği halde tekrar talebinin reddolunduğu Ma‘rûz Hocapaşa mahallesi avârız vakfının mütevellîsi el-Hâc İshak Efendi b. el-Hâc Ahmed meclis-i şer‘-i şerîf-i enverde arzuhâl eden Ayasofya-i Kebîr Câmî‘-i Şerîfi İmâmı es-Seyyid Hasan Efendi b. es-Seyyid Abdurrahman ile terâfu‘larında bin yüz seksen altı senesi Receb’i târîhiyle müverrah merkûm es-Seyyid Hasan Efendi yedinde olan hüccet mûcebince mâl-ı vakf-ı mezkûrdan zimmetinde olan sekiz yüz seksen guruşun altı yüz guruşunu ben bi’t-tevliye kabz edip bâkî iki yüz seksen guruşu zimmetinde olmağla taleb ederim deyü ba‘de’d-da‘vâ ve’l-istintâk merkûm es-Seyyid Hasan Efendi cevâbında meblağ-ı mecmû‘-ı mezkûr sekiz yüz seksen guruşu bin yüz seksen yedi senesi Receb-i Şerîfi gurresinde mütevellî-i müdde‘î-i merkûma tamâmen edâ ve teslîm edip deyn-i mezkûrdan zimmetimde bir akçe bâkî kalmamışdır deyü eylediği def‘ini ba‘de’l-inkâr adl ve [ve] makbûlü’ş-şehâde olan es-Seyyid İsmail Efendi b. es-Seyyid İbrahim ve Hüseyin Beşe b. Abdülkadir şehâdetleriyle müdde‘î-i mezbûr muvâcehesinde vech-i şer‘î üzre isbât etmeğin mûcebince müdde‘î-i merkûm el-Hâc İshak Efendi da‘vâ-yı mezkûresiyle mezbûr es-Seyyid Hasan Efendi’ye bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 17 min Muharrem sene 1203.