İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 257 Hüküm no: 284 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne’de üretilen süpürgenin belirlenen satış fiyatının üzerinde satılmaması Mısır hasır süpürgeci kethüdâsı ve yiğitbaşı ve bi’l-cümle ustaları hâlâ mahrûse-i Edirne’de hâsıl süpürgenin bin adedi yüz üç guruşa alınıp beşer guruşa mahrûse-i mezbûrede süpürge iştirâsına taraflarından müte‘ayyin kimesneye ücret ve on iki buçuk guruşa Âsitâne’ye nakl içün araba ücreti iki guruş gümrük on altı buçuk guruş Âsitâne’de dikilip kemâl bulmak içün kalfalarına ücret verilip sâ’ir mesârif-i müteferrikaları dahî beş guruş mikdâr olmağla beher aded süpürge Âsitâne’de kendileri dükkânlarında yedişer pâreye ibâdullâha bey‘ olunsa bin aded süpürgede kendilere otuz bir guruş fâiz kalıp beher süpürgede üçer buçuk akçe mikdârı nef‘leri olmağla esnâf-ı mezbûrdan her dükkânlarında i‘mâl eyledikleri süpürgenin a‘lâsının yedişer pâreye ibâdullâha bey‘ edip ziyâde bey‘a cesâret edeni bulunur ise te’dîb olunmak üzere müte‘ahhid olduklarından sonra ayakda süpürge bey‘ eden ve attâr makûlesi içün birer pâre zam ile merkûmlar dahî sekizer pâreye bey‘ etmelerini iltimâs eyledikleri ma‘lûm-ı devletleri buyuruldukda emr hazret-i veliyyü’l-emrindir.