İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 258 Hüküm no: 286 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın, Âişe Hânım ve Şerîfe Fatma Hanım’a ait vakıf arazisinin bir yıllık iltizam bedelinden borcu hususunda sulh yoluyla anlaştıkları Ma‘rûz Mübârek rikâb-ı müstetâba takdîm olan işbu arzuhâle binâ’en sâdır olan emr-i âlîlerine imtisâlen derûn-ı arzuhâlde mezkûr Mustafa Ağa b. Abdullah Çarşamba günü arz odasında huzûr-ı âsafânelerinde ba‘dehû dâ‘îhânede ma‘kûd meclis-i şer‘-i şerîf-i enverde sâhibeteyy-i arzuhâl ma‘rifetü’z-zât Âişe Hânım bt. İbrahim ve Şerîfe Fatma bt. Mehmed ile terâfu‘larında mezbûre Âişe Hânım evlâdiyet ve meşrûtiyet üzre mütevelliyesi olduğu Kasım Bey Vakfı’nın müstagallâtından olmak zu‘mıyla Filibe kazâsında vâki‘ bir bâb çiftlik hâsılâtını ve ana teba‘iyyet ile zirâ‘at olunan arâzî-i vakfın öşr ve irâdât-ı sâ’iresini bir sene zabt ve kabz etmek üzre bin yüz doksan bir senesi bana bin beş yüz guruşa bi’t-tevliye ilzâm ben dahî iltizâm ve kabûl ve dokuz yüz elli guruşunu ber-vech-i peşîn mâlımdan mütevellî-i mezbûreye teslîm ol dahî kabz edip lâkin kazâ-i mezbûrede vakf-ı mezkûrun çiftlik ve arâzîden aslâ nesnesi olmayıp hâsılât-ı vakf olmak üzere bir akçe kabzım olmamağın medfû‘um olan meblağ-ı mezkûr dokuz [79a] yüz elli guruşu taleb ederim deyü da‘vâ ol dahî cevâbında hâl minvâl-i muharrer üzere olup sene-i mezbûrede hâsılât-ı vakfdan müdde‘î-i mezbûrun nesne kabz etmediğini ve yedinden ve mâlından dokuz yüz elli guruşu bin yüz doksan dört senesi Muharremi’nde Mahmudpaşa Hamâmı dimekle ma‘rûf çifte hamâmın ihâle-i mahsûsa mahâllinde işbu Şerîfe Fatma tarafımdan vekâleten iki yüz esedî guruş ve yedi yüz elli guruşluk olmak üzere beş yüz altmışlık ki cem‘an dokuz yüz elli guruş huzûr-ı Müslimîn’de müdde‘î-i mezbûra edâ ve teslîm olunup zimmetim beriyye olmuşdur deyü eylediği def‘ini ba‘de’l-inkâr beyân sadedinde iken bâ-vesâtat-ı muslıhîn müdde‘î-i mezbûr Mustafa Ağa da‘vâ-yı mezkûresinden mütevelliye-i mezbûre tarafından vekîli mezbûre Şerîfe Fatma ile dört yüz guruş üzerine sulh olup mâ‘adâ işbu yüz elli guruş mutâlebesinden mezbûretân Âişe Hânım ve Şerîfe Fatma’nın zimmetlerini ibrâ eyledikde mezbûre Şerîfe Fatma sulh ve ibrâyı mezbûretân asâlaten ve vekâleten ba‘de’l-kabûl bedel-i sulh olan meblağ-ı mezkûr dört yüz guruşu edâya bi’t-taleb tenbîh olunduğu huzûr-ı âlîlerine i‘lâm olundu. Fî 2 min Rebî‘i’l-evvel sene 1203.