İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 265 Hüküm no: 295 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İksirci İsak v. Mosi ile İsak v. Panto’nun evleri arasındaki yirmi parmak duvarın eşit bir şekilde paylaştırılması Ma‘rûz Sâdır olan fermân-ı âlîlerine imsitâlen kıbel-i şer‘den mürsel kâtib Merhabâzâde Mahmud Efendi ve Harameyn-i muhteremeyn müfettişi müderrisîn-i kirâmdan es-Seyyid Abdülhalim Efendi dâ‘îleri tarafından mürsel Çeşmizâde Mehmed Mesud Efendi ve hâssa mi‘mârı hulefâsından Hâfız İsmail ve diğer İsmail Halîfeler ile Havâss-ı Refî‘a kazâsına muzâfa Hasköy kasabasında Keçeci Ahmed Çelebi mahallesinde vâki‘ münâza‘un fîh olan Yahûdîhâne’ye varıp Müslimîn huzûrlarında akd eyledikleri meclis-i şer‘de nezâret-i dâ‘îlerinde olan Kâmetîzâde Vakfı’ndan bir bâb Yahûdîhâne’ye mutasarrıf olan arzuhâl eden İksirci İsak v. Mosi mütevellîsi Kâmetîzâde Mehmed Fazlullah Efendi hâzır olduğu hâlde derûn-ı arzuhâlde mezkûr Dârü’s-saltanati’ş-şerîfe ağa nezâretinde âsûde evkâfdan Mehmed Emin Ağazâde Hüseyin Ağa Vakfı’ndan bir bâb Yahûdîhâne arsasına mutasarrıf olan diğer İsak v. Panto Yahûdî muvâcehesinde mütevellî es-Seyyid Abdülvehhâb hâzır olduğu hâlde işbu derûnunda akd-i meclis-i şer‘ olunan bir tarafdan tarîk-i âm ve bir tarafdan Yağcılar Kethüdâsı Mehmed Sadık Ağa tasarrufunda olan Yahûdîhâne ve bir tarafdan Yahûdîhâneler içün terk olunan arsa ve bir tarafdan sâlifü’z-zikr Hüseyin Ağa Vakfı’ndan mersûm diğer İsak tasarrufunda olan arsa ile mahdûd bir bâb Yahûdîhâne’nin arsasından mersûm diğer İsak Yahûdî arzen iki zirâ‘ ve tûlen yirmi bir zirâ‘ arsamı fuzûlî gasb ve üzerine müceddeden taş duvar binâ etmekle zikr olunan duvarı ref‘ ve ol mikdâr arsayı bana teslîme tenbîh olunmak murâdımdır deyü mütevellîleri huzûrunda da‘vâ eyledikde mütevellîleri hâzırân-ı mezbûrâna nazar eylediklerinde zikr olunan arzen yirmi parmak ve tûlen yirmi bir zirâ‘ taş duvar beyinlerinde müşterek olduğu ba‘de’t-tasdîk mahalle-i mezbûre ahâlîsinden es-Seyyid Mehmed Emin b. el-Hâc Abdullah ve Mustafa b. Mehmed nâm kimesneler dahî alâ tarîkı’ş-şehâde haber vermeleriyle zikr olunan taş duvarı tekmîl ve beyinlerinde on parmağı müdde‘î-i mesfûrun ve on parmağı mesfûr-ı diğer İsak Yahûdînin olmak üzere tevâfık ve terâzî olduklarını mevlânâ-yı mezbûrân mahallinde ketb ve tahrir ve ma‘an mürsel ümenâ’-i şer‘le meclis-i şer‘a gelip alâ vukû‘ihî inhâ ve takrîr eyledikleri huzûr-ı âlîlerine i‘lâm olundu. Fî gurre-i Rebî‘i’l-evvel sene 1203.