İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 263 Hüküm no: 294 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bürüncek bükücü esnafı ile kazzâz esnafının hilâf-ı kanûn birbirlerinin işlerine karışmamalarının emredildiği Ma‘rûz Mübârek rikâb-ı kamer-tâb-ı hüsrevâniye takdîm olan arzuhâle binâ’en sâdır olan emr-i âlîlerine imtisâlen ashâb-ı arzuhâl bürüncek bükücü esnâfı kethüdâsı el-Hâc Ahmed ve Yiğitbaşı Hüseyin vesâ’ir ma‘lûmü’l-esâmî ustalar Harameyn-i muhteremeyn müfettişi müderrisîn-i kirâmdan es-Seyyid Abdülhalim Efendi dâ‘îleriyle bi’l-ma‘iyye Çarşamba günü arz odasında huzûr-ı âsafânede akd olunan meclis-i şer‘-i münîrde merhûm ve mağfûrun leh Sultân Ahmed Hân -tâbe serâhu- hazretlerinin sarây-ı cedîd-i âmirede kütübhâne-i celîleleri vakfı mütevellîsi hâzır olduğu hâlde kazzâz esnâfı kethüdâsı Ömer ve Yiğitbaşı Mehmed vesâ’ir ma‘lûmü’l-esâmî ustalar ile terâfu‘larında hâmiş-i arzuhâlde muharrer derkenâr nâtık olduğu üzre harîrin incesini tüccârdan iştirâ biz iştirâ ve çehre edip ibâdullâha vesâ’ir iktizâ edenlere bey‘ ve kazzâz esnâfı esnâfımıza hufyeten harîr verip ücretle çehre büktürmeyeler deyü yedimizde emr-i âlî vâr iken merkûmlar hâlâ Fazlı Paşa Sarâyı’nda otuz aded destgâh ihdâs etmek murâd ederler men‘ olunması murâdımızdır deyü da‘vâ anlar dahî cevâblarında bükücü esnâfından kudreti olanlar tüccârdan harîr iştirâ ve kendilere çehre edip kazzâzâna ve ibâdullâha bey‘ ve kudreti olmayanlara dahî kazzâzâna harîr verip ücretle çehre olunup dükkânlara bey‘ eylemek âdet-i kadîm iken bu esnâda bükücü esnâfı hilâf-ı kadîm kazzâzâna bürüncek bükmemek üzre beyinlerinde nizâma rabt ve bürünceği biz büküp biz füruht ederiz deyü kazzâzâna gadr murâd etmeleriyle biz dahî dükkânlarımızda bey‘ etmek üzere kendimiz bürüncek bükdürmek içün vakf-ı mezkûr müstagallâtından sâlifü’z-zikr Fazlı Paşa Sarâyı derûnunda boyahâne ittisâlinde olan arsa üzerine otuz aded bürüncek destgâhı olmak üzere nef‘an li’l-vakf ve hıfzen li’n-nizâm beş yüz [81a] guruş mu‘accele ve mukaddemâ ibrişim bükücü tâ’ifesini iskân etmek üzere mahalle-i mezkûrede ihdâs olunan destgâhlar içün veregeldiğimiz iki bin guruş mü’eccele üzere altı yüz guruş zam ile cem‘an senevî iki bin altı yüz guruş taraf-ı vakfa edâ ve müceddeden iktizâ eden binâyı dahî teberru‘an li’l-vakf edip ve beher çehre bürünceği ibâdullâha el-an yüzer pâreye eğer harîr noksan semen ile iştirâ olunur ise iktizâsına göre yüz pâreden noksâna bey‘ etmek şartıyla otuz sehm i‘tibârıyla taraf-ı vakfdan yedlerimize başka başka temessük i‘tâ olunup mahâll-i mezkûrede bürüncek bükdürdüğümüze ve kadîmi üzere çehre ve penbe ve kenarlık harîr ve tebre ve elvân-ı ipek füruht etmemize taşradan bürüncek bükücüler tarafından ve taraf-ı âhardan müdâhale olunmamak üzre hân-ı mezkûrede cârî şürût ve nizâmımızı hâvî yedimize emr-i âlî i‘tâ ve cânib-i vakfa ilm u haber verilmesi muvâfık-ı rızâ-yı hümâyûn-ı mülûkâne ise deyü Dârü’s-sa‘âdetü’ş-şerîfe ağası ma‘rifetiyle atabe-i ulyâ-ı mülûkâneden bâ-takrîr istîzân olundukda nef‘an li’l-vakf tanzîmine izn-i hümâyûnumdur deyü bâlâ-yı takrîre mübârek ve mes‘ûd hatt-ı şerîf-i şevket-redîf keşîde ve erzânî kılınmağın asl-ı hatt-ı hümâyûn Harameyn-i şerîfeyn muhâsebesine hıfz olunup mûcibince yedimize işbu bir kıt‘a emr-i âlî i‘tâ ve bâlâsı mûcibince amel oluna deyû mübârek hatt-ı hümâyûn-ı inâyet-makrûnu ile tevşîh olunmuşdur deyü bi’l-cümle takrîr ve meşrûhlarına mutâbık bâlâsı hatt-ı hümâyûn-ı şevket-makrûnla müveşşah bir kıt‘a emr-i âlî ibrâz etmeleriyle hilâf-ı emr-i hümâyûn kazzâz esnâfına müdâhale etmemek üzre bükücü esnâfına ba‘de’t-tenbîh kazzâzâna işbu şürût-ı cedîdeleri kalemine kayd ve yedlerine bir kıt‘a emr-i âlî dahî inâyet buyurulmak ricâsında oldukları huzûr-ı âlîlerine i‘lâm olundu. Fî 4 min Rebî‘i’l-evvel sene 1203.