İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 70 Hüküm no: 5 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rü’yet-i Hilâl kaydı Yâ Fettâh yâ Bâsıt yâ Muksıt yâ Rahmân iyyâke neste‘în ve aleyke’t-tüklân Bismillâhirrahmânirrahîm İstanbul Kādısı izzetlü faziletlü efendi hazretleri İşbu i‘lâmları rikāb-ı müstetâb-ı cihândârîye arz ve takdîm olundukda bâlâsına kâffe-i umûrlarında mazhar-ı tevfîk-i İlâhî olmalarını hâvi ve mûcebince leyle-i şerîfe-i merkūmede ber-mûceb-i de’b-i dîrîn icrâ-yı resm-i tenvîr ve tezyîn için da‘avât-ı icâbet-gāyât-ı Hazret-i zıllullâhîyi muhtevî hatt-ı hümâyûn-ı nezâket-makrûn şeref-efzâ-yı sudûr olmağla mûcebince iktizâ-yı nizâmına himmet buyuralar deyü buyruldu. Fî-26 Ş sene [12]16 Gurre-i Ramazani’l-mübârek Matla‘-ı ehille-i devlet ve ikbâl olan südde-i seniyyeyi bi-emri’l-iclâle bi’t-tazarru‘ ve’l-ibticâl ber-dâşte-i ubûdiyet-i işti‘mâlleridir ki târih-i hicret-i Nebeviyye aleyhi ve alâ-âlihî efdâlü’t-tahiyyenin işbu bin iki yüz on altıncı senesi Şa‘bâni’l-mu‘azzamı gurresi yevm-i isneyn olduğu ber-nehc-i şer‘î sâbit ve mütehakkık ve ol vechile hükm-i şer‘î lâhık olmağla işbu pazartesi günü yirmi dokuzu olup ferdâsı selhi olan Salı gecesi hilâl-i Ramazani’l-mübârek rü’yet ve müşâhede olunmaz ise Şa‘bâni’l-mu‘azzam selâsin ile itmâm ve Çarşamba günü gurre-i Ramazani’l-mübârek olup şer‘an sıyâma şürû‘ ve ikdâm emr-i vâcibü’l-ihtimâm olmağla kudûm-i meymenet-lüzûm-ı mâh-ı mübâreki tebşîr ve i‘lân ve sürûr-endâz kılıp ehl-i imân olmak için leyle-i şerîfe-i merkūmede ber-mûceb-i de’b-i dîrîn kāmet-zîbâ-yı minârât-ı cevâmi‘-i câmi‘ati’l-berekât ilbâs-kubbâ-yı zerrîntâr-ı kanâdil ile tezyîn olunmak bâbında ısdâr-ı fermân-ı cihân-mutâ‘ menût-ı irâde-i aliyye-i vâcibetü’l-ittibâ‘ idüğü İstanbul mahkemesinden âsitân-ı âsumân-tüvânlarına i‘lâm olundu. Bâkī fermân li-hazret-i veliyyü’n-ni‘meti ve’l-ihsân.