İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 71 Hüküm no: 6 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyük yangından dolayı Bursa’ya zahîre gönderilmesi Mahrûse-i Bursa’ya zehâyir i‘tâsı Ma‘rûz İşbu i‘lâmda muharrer mahrûse-i Bursa’da bi-kazâillâhi te‘âla vukū‘ bulan harîk-i kebîrde bi’l-cümle mevcûd zahîreleri muhterik ve zâyi‘ ve cümle ahâlî kemâl-i zarûrete giriftâr olmalarıyla esmânı iki mâh va‘de ile taraf-ı vilâyetden edâ olunmak şartıyla derûn-ı i‘lâmda münderic envâ‘-ı zehâirin Âsitâne-i aliyyeden i‘tâ buyrulmasını istid‘â ve istirhâm ederler. Eğerçi zehâyir-i merkūmenin Âsitâne-i aliyyeden mahâll-i sâireye verilmesi memnû‘atdan olup ve bu vakte dek mesbûk bi’l-misl olmadığı gümrük defterlerinden diğer arzuhâl hâmişinde olan derkenârdan müstebân olup ancak bunca ibâdullâhın mevsim-i şitâda ve eyyâm-ı mübârekede bu vechile zarûretlerinde inâyet ve ihsân-ı şîme-i kerîme-i devlet-i aliyye ve merhamet ve şefkat-i saltanat-ı seniyye muktezâsından olmağla ancak bu def‘a hallerine merhameten fîmâ ba‘d Âsitâne-i aliyyeden zehâyir matlûb ederler ise müsâ‘ade olunmamak ve lede’s-suâl gümrük defterlerinden işbu madde emsâl olmak üzere derkenâr olunmamak şartıyla buyruldu-i âlîleriyle zahîre nâzırı izzetlü efendi bendeleri ma‘rifetiyle hubûbâta dâir olan istid‘âları tıbk-ı müsted‘âları tanzîm olunmakda olup ondan mâ‘adâ iki yüz yirmi kantar revgan-ı don ve mukābili olan yüz on kantar revgan-ı çerviş Âsitâne bal kapanından i‘tâ olunmak bâbında ve iki yüz yirmi kantar revgan-ı sâde ve bir kebîr fıçı mum ve iki yüz zenbil pirinç ve bin beş yüz vakıyye kaşkaval peyniri ve iki bin beş yüz vakıyye tulum peyniri ve bin vakıyye pastırma derûn-ı i‘lâmda mezkûr es-Seyyid Süleyman Ağa kulları ashâbından iştirâ ve icâleten mahrûse-i merkūmeye irsâline mümâna‘at olunmamak bâbında gümrük emini ağa kullarına hitâben fermân-ı âlîleri sudûru iktizâ eylediği ma‘lûm-ı devlet-i aliyyeleri buyruldukda ol bâbda emr u fermân hazret-i veliyyü’l-emrindir. Fî-19 Ş [1]216