İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 78 Hüküm no: 16 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraya sebze veren bahçıvân esnafının sulh oldukları Bahçıvânların ta‘ahhüdü Ma‘rûz Bahçıvân esnâfından arzuhâl eden Yedikule kolunun yiğitbaşıları Sanba ve Hristo ile Piyo ve Kostandi ve Avram ve Petro vesâirleri <<İslambol’da>> meclis-i şer‘-i münîrde hâlâ sebzecibaşı Halil Ağa’nın bölükbaşısı Bostanî İbrahim b. Ali hâzır olduğu hâlde arzuhâlde mastûr Küçük Lanka kolunun yiğitbaşısı Pino ve Oftem ve Selo ve Yorgi ve Ziso ve Tako ve Hristo ve Dimo ve Nikola ve Dimitraki nâm zimmîler muvâcehelerinde kadîmden beri saray-ı hümâyûn için verilen sebzevât vesâir ber-mu‘tâd vâki‘ olan mesârifât teslîs olunup bir sülüsânını biz ve bir sülüsü Küçük ve Büyük Lanka kolunda olan bahçıvânlar hissesi olarak cem‘ine me’mûra teslîm edegelmişken bu esnâda saray-ı hümâyûn için sebzecibaşıya vermeğe müte‘ahhid olmamızla külle yevm teslîm eylediğimiz yevmî iki yüz vakıyye pırasadan Küçük Lanka kolu mesfûrûn bir hisselerini edâdan imtinâ‘ etmeleriyle suâl olunup hisselerini teslîm eylemeleri matlûbumuzdur dediklerinde onlar dahi cevâblarında biz saray-ı hümâyûn için hıyar ve semiz otu ve salata ve soğan ve turşuluk badıncanı müstakillen edâ eylediğimize binâen pırasadan hissemizi vermekden imtinâ‘ ederiz demeleriyle bu vechile beynimizde münâza‘ât-ı kesîre vâkı‘a olmuş idi el-hâletü hâzihi bâ-tavassut-ı muslihîn beynimiz ıslâh olunmağla biz mevsiminde matlûb olan iki yüz vakıyye pırasayı mahalline teslîm onlar dahi kadîmden veregeldikleri mârrü’l-beyân sebzeleri müstakillen edâ ve her birimiz âhardan hisse mütâlebesiyle ahad-ı tarefeyn âharı ve bölükbaşı-yı hâzır-ı merkūm dahi her birimizin vermeğe müta‘ahhid olduğumuz sebzeden ziyâde mütâlebesiyle her birimizi rencîde etmemek üzere ta‘ahhüd ve kavil ve ittifâk eyledik deyü takrîrlerini hâzır-ı merkūm ve Küçük Lanka kolu neferâtı mesfûrûn tasdîk ve bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-21 min Ş sene [1]216