İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 77 Hüküm no: 15 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Mehmed’in, Ahmed Reşid ile alacak davasında sulh oldukları Bedel-i sulh 400 guruşu edâya tenbîh Ma‘rûz Arzuhâlde mezkûrü’l-ism mu‘arrefetü’z-zât Hanife bt. Mehmed nâm hatun meclis-i şer‘-i münîrde kızı kezâlik zâtı mu‘arrefe Fâtıma bt. Kebabcı Mehmed hâzıra olduğu hâlde sâhib-i arzuhâl Ahmed Reşid b. İshak mahzarında merkūm Ahmed Reşid zimmetinde verdiği işbu bir kıt‘a temessük nâtık olduğu üzere cihet-i karzdan beş yüz guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm ile kat‘an li’n-nizâ‘ an inkâr dört yüz guruşa sulh olduğumda ol dahi sulh-i mezkûru ba‘de’l-kabûl bedel-i sulhden mâ‘adâ ziyâde müdde‘âma ve işbu târih-i i‘lâma gelince sâir hukūk-ı şer‘iyyeye müte‘allika âmme-i de‘âvi ve mütâlebât ve kâffe-i eymân ve muhâsemâtdan ben ve kızım hâzıra-i mezbûreden her birimiz merkūm Ahmed Reşid’in zimmetini ibrâ-yı âmm-ı sahîh-i şer‘î ile ibrâ ve iskāt eylediğimizde ol dahi ber-vech-i muharrer ibrâmızı kabûl eyledi deyü mukırra-i mezbûre Hanife’nin bi’l-cümle takrîr ve meşrûhunu kızı hâzıra-i mezbûre Fâtıma ve merkūm Ahmed Reşid’den her biri ba‘de’t-tasdîk ibrâdan müstesnâ bedel-i sulh-ı mezkûr ve dört yüz guruşu müdde‘iye-i mezbûre Hanife Hatun’a edâsıyla mezbûr Ahmed Reşid’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-19 min-Şa‘ban sene [1]216