İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 85 Hüküm no: 27 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine bt. Mehmed’in, boyacı dükkânını Tegodoş v. Kostandi’ye kiraladığı Boyacı dükkânından 1000 guruşa ba‘de’s-sulh icâr Ma‘rûz İslâmbol’da Nahilbend Mahallesinde sâkine sâhibe-i arzuhâl mu‘arrefetü’z-zât Şerîfe Emine bt. Mehmed nâm hatun meclis-i şer‘-i münîrde bi’l-ma‘iyye rü’yete me’mur Haremeyni’ş-Şerîfeyn Müfettişi müderrisîn-i kirâmdan Mehmed Atâullah Efendi tarafından mürsel Kâtib es-Seyyid Ali Rızâ Efendi hâzır olduğu hâlde boyacı esnâfından arzuhâlde mastûrü’l-isim Tegodoş v. Kostandi zimmî muvâcehesinde Yorgi v. Kasta ve Bezo v. Dimitri nâm zimmîler hâzır oldukları hâlde ashâb-ı hayrâtdan ser-çavuşân-ı dergâh-ı âlî Çoban Süleyman Ağa vakfından mahrûse-i Galata’ya muzâfe Ortaköy’de vâki‘ bi’l-îcâreteyn mutasarrıfe olduğum mukaddemâ doğramacı ve hâlâ boyacı dükkânında mersûm Tagadoş zimmî beher mâh onar guruş icâre kavliyle müstecirim olmağla gāyet-i şehr-i âtîde fesh-i îcâr etmemle dükkân-ı mezkûru tahliyye ve bana teslîme tenbîh olunması murâdımdır deyü da‘vâ ettikde ol dahi cevâbında ber-vech-i muharrer müdde‘âmı ikrâr lâkin mahrûse-i mezbûrede Hamidiye Vakfı’ndan olan kırk aded boyacı gediğinden olarak karye-i mezbûrede âhar mahalde olan gedik âlâtını müsteciri olduğum dükkân-ı mezkûra nakl ve sülüsünü benim ve sülüsânını hâzırân-ı mersûmânın bâ-temessük-ı mütevellî tasarrufumdadır deyip bu vechile beynimizde ba‘de vukū‘ı’l-münâza‘a tavassut-ı muslihîn ile beynimiz ıslâh ve tevfîk olunmağın mersûm Tagadoş zimmî gedik bahâ nâmıyla bana bin guruş verip ben dahi ba‘de’l-kabz dükkân-ı mezkûru mu‘teber gedik olup bilâ-mûceb dükkân-ı mezkûrdan müstecirim mesfûr Tagadoş zimmîyi ihrâc eylememek üzere ke’l-evvel mâhiye on guruş icâre kavliyle mesfûre îcâr ve teslîm eylediğimde ol dahi istîcâr ve kabûl edip bu vechile kat‘-i nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-23 min-Şa‘ban sene [1]216