İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 85 Hüküm no: 26 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Abdullah’ın, bakkal dükkanı ile yanındaki odayı Mihal v. Vasil’e kiraladığı Oda-i mezkûr kemâ-fi’s-sâbık yedinde ibkāya Ma‘rûz Na‘lbur Hasan Beşe b. Abdullah meclis-i şer‘-i münîrde bakkāl Mihal v. Vasil zimmî muvâcehesinde mersûm Mihal zimmî İstanbul’da Balatkapısı dâhilinde Zena? Yokuşu nâm mahalde vâki‘ mutasarrıf olduğum bir bâb bakkāl dükkânıyla üzerinde olan bir bâb odada ayda beşer guruş kirâ kavliyle müstecirim ve derûnunda olan gedik âlâtı kendi mülkü olup lâkin dükkân-ı mezkûrda müte‘ayyen odadan başka ittisâlinde olan bir bâb odayı dahi mersûm Mihal zimmî fuzûlî zabt ve zevcesini iskân etmekle suâl olunup oda-i mezkûrdan keff-i yed ve bana teslîmine tenbîh olunmak murâdımdır deyü da‘vâ ettikde ol dahi cevâbında ben zevcem mezbûreyi iskân eylediğim oda müsteciri olduğum dükkân üzerinde olmağla dükkân ile ma‘an bana îcâr etmişlerdi deyü da‘vâ ve başka oda olduğunu inkâr etmekle istikşâf-ı hâl için taraf-ı şer‘den mürsel Çukadâr Mehmed Ağa ve esnâf-ı mezkûre Pazarbaşısı Süleyman Ağa ve bölükbaşıları es-Seyyid Ahmed dükkân-ı mezkûra varıp ba‘de’n-nazar bakkāl-ı mersûma mahsûs oda olduğunu meclis-i şer‘a inhâ ve müdde‘î-i mezbûr dahi tasdîk etmekle oda-i mezkûre kemâ-fi’s-sâbık bakkāl-ı mersûmun tasarrufunda ibkā olunduğu İstanbul Mahkemesi’nden huzûr-ı âlîlerine i‘lâm olundu. Fî-23 min-Şa‘ban sene [1]216