İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 100 Hüküm no: 50 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salı Günü Ramazan orucuna başlanılacağı ve kandillerin yakılması gerektiği İstanbul Kādısı İzzetlü Fazîletlü Efendi hazretleri işbu i‘lâmınız rikāb-ı hümâyûna arz olundukda ma‘lûm-ı hümâyûnum olmuşdur mazmûnunda hatt-ı hümâyûn-ı şevket-makrûn-ı şeref-yâfte-i sudûr olmağla keyfiyeti iktizâ edenlere tenbîh eyleyeler deyü buyruldu. Fî-19 N sene 1216 Îkād-ı kanâdil İşbu Ramazani’l-mübârek gurresi Salı günü olduğu mahrûse-i Bursa Kādısı Feyzullah Afif Efendi huzûrunda bir kıt‘a i‘lâm-ı şer‘î nâtık olduğu üzere şuhûd-ı udûl şehâdetleriyle vech-i vecih-i şer‘î üzere sâbit ve hükm-i şer‘î lâhık ve mûcebince yevm-i mezbûrda nâssa sıyâm ile emr olunduğu meclis-i kazâda bulunan Hasan Efendi b. Hüseyin ve Ahmed Efendi b. Veliyüddin şehâdetleriyle Âsitâne-i aliyyede meclis-i şer‘-i münîrde şer‘an sâbit ve ol vechile hükm-i şer‘î lâhık olmağla bu sûretde şehr-i şerîf-i merkūmun yirmi yedinci Pazar gecesi leyle-i kadr ve perşembe günü îd-i sa‘îd olmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fi’l-leyletü’s-sâmineti aşar min-Ramazani’l-mübârek sene 1216