İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 105 Hüküm no: 58 Orijinal metin no: [8a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İsmail b. Mehmed’in vâkıf evladından olduğunu ispat edemediğinden vakıf tevliyetinin Şeyh Sülayman’da kaldığı Tevliyet da‘vâsıyla mu‘ârazadan ba‘de’l-men üzerinde ibkā Ma‘rûz Anadolu’da Tire kazâsı ahâlîsinden derûn-ı arzuhâlde mezkûrü’l-ism es-Seyyid İsmail b. Mehmed meclis-i şer‘-i münîrde kazâ-i mezbûre muzâfe Güllüce karyesinde vâki‘ Umur Bey ve İsa Bey an evlâd-ı Tâmi Seydî Vakfı’nın tevliyet ve meşîhatine ber-vech-i meşrûta bâ-berât mutasarrıf olan sâhib-i arzuhâl eş-Şeyh Süleyman Efendi b. Ebûbekir mahzarında tevliyet ve meşîhat-i mezkûre vâkıfın evlâd-ı evlâd-ı evlâdına meşrûta olup ve babam Mehmed kazâ-i mezbûrda kâin Elvan Seydî vakfının tevliyetini üzerine tevcîh ve berât ettirdiğine binâen zikr olunan Umur Bey ve İsa Bey tevliyetlerini dahi bilâ-berât zabt etmişdi el-hâletü hâzihi tevliyet-i mezkûre evlâda meşrûta ve ben evlâd-ı vâkıfdan olduğuma binâen tevliyet-i mezkûre merkūmun ref‘inden ber-vech-i meşrûta bana tevcîh olunması matlûbumdur deyü da‘vâ ettikde ol dahi cevâbında tevliyet ve meşîhat-i mezkûre evlâda meşrûta olup ve ben evlâd-ı vâkıfdan olmamla tevliyet ve meşîhat-i mezkûreyi üzerime tevcîh ve berât ettirmişdim deyip müdde‘î-i mezbûr es-Seyyid İsmail’in evlâddan olduğunu inkâr etmekle müdde‘î-i mezbûr vâkıfân-ı mûmâ-ileyhimâ ile kendi beyninde olan vasâiti zikr u beyâna bir vechile kādir ve yedinde ihticâca sâlih vakfiye ve sened-i âharı olmamağla bu vechile olan da‘vâsı mesmû‘a olmamağla kelâmına iltifât olunmayıp bî-vech mu‘ârazadan ba‘de’l-men‘ tevliyet ve meşîhat-i mezkûre mezbûr eş-Şeyh Süleyman’ın kemâkân üzerinde ibkā buyrulup ve kalemine dahi şerh verilmek iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fi’l-yevmi’l-hâmis min-Şevvâli’l-mükerrem li-sene sitte aşara ve mi’eteyn ve elf.