İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 106 Hüküm no: 59 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Nikagos v. Avanes’in, Zakar v. Kirkor’a karşı açtığı alacak davasında, iddiasını ispat edemediğinden muarazadan men edildiği Mu‘ârazadan men‘ Ma‘rûz Tütüncü Nikogos v. Avanis zimmî meclis-i şer‘-i münîrde Zakar v. Kirkor zimmî muvâcehesinde İslâmbol’da Leblebiciler Hânı karşısında vâki‘ bir bâb tütüncü dükkânı derûnunda mevcûde gedik tâ‘bir olunur âlât-ı lâzıme-i ma‘lûmeye ben ve işbu hâzır bi’l-meclis Avanis zimmî münâsafaten mâlik ve mutasarrıflar iken şerîkim hâzır-ı mesfûr Avanis zimmî âlât-ı gedik-i mezkûrda olan nısf hissesini bey‘ irâdesinde olmağla mersûm Zakar zimmî ben iştirâ edeyim ba‘dehû üç gün mürûrunda sana bey‘ ederim deyü bana va‘d ba‘dehû nısf gedik-i mezkûru bin guruşa iştirâ ve kabz etmişdi el-hâletü hâzihi mücerred va‘dine binâen meblağ-ı mezkûr bin guruşu yedimden ahz ve nısf-ı âlât-ı mezkûreyi bana bey‘e mersûm Zakar zimmîye cebr olunması matlûbumdur deyü tasaddî eylediği da‘vâsı takrîr-i meşrûhu üzere meşrû‘a olmamağla kelâmına iltifât olunmayıp bî-vech mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-9 min-Şevvâl sene [1]216