İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 113 Hüküm no: 71 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Bedros’un, Kuyumcu Arotin v. İsayi’ye sattığı çiftlik ve içerisindeki hayvanlarını teslim etmesi gerektiği Çiftlik-i mezkûru teslîme emr-i âlî sudûru Ma‘rûz Arzuhâl eden Kuyumcu Arotin v. İsayi nâm zimmî meclis-i şer‘-i münîrde Begos v. Bedros nâm zimmî muvâcehesinde mesfûr Begos zimmî bin iki yüz on üç senesi Rebî‘ülâhirinin on birinci günü târihiyle muvarraha işbu bir kıt‘a mübâya‘a hücceti nâtık olduğu üzere yedinde mülkü ve tasarrufunda olan vilâyet-i Anadolu’da Yalakâbad kazâsında vâki‘ Yörükler çiftliği demekle ma‘rûf bir kıt‘a çiftlik menzili ve derûnunda mevcûde on re’s kara sığır ineği ve iki re’s buzağı ve iki re’s tonbay ve iki çift kara öküz ve iki re’s kısrağı semen-i ma‘lûme ve makbûza bana bey‘ ve teslîm ben dahi iştirâ ve kabz etmişken çiftlik ve hayvanât-ı mezkûreyi fuzûlî zabt etmekle bana teslîme tenbîh olunmak matlûbumdur deyü da‘vâ eylediğimde mesfûr Begos zimmî dahi cevâbında kaziyye minvâl-i muharrer üzere olduğunu tasdîk ve çiftlik-i mezkûr ile derûnunda olan hayvanât-ı muharrere-i merkūmeyi müdde‘î-i mersûm Arotin zimmî tarafından kabza tevkîl eylediği Bedek v. Manol zimmîye mahallinde teslîme ta‘ahhüd etmekle ikrâr ve ta‘ahhüdü mûcebince çavuş mübâşeretiyle vekîl-i mezbûra teslîmi bâbında bir kıt‘a emr-i âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-12 min-Şevvâl sene [1]216