İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 113 Hüküm no: 70 Orijinal metin no: [9b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sâdık b. Mehmed’in, sarraf Marat v. Mıgırdıç ile alacak meselesinde sulh oldukları İbrâ Ma‘rûz Hâssa hasekilerinden sâhib-i arzuhâl Mehmed Sâdık b. Mehmed meclis-i şer‘-i münîrde arzuhâlde mastûr Sarraf Marat v. Mıgırdıç zimmî muvâcehesinde ben ücretle hizmet eder makūlesinden olmamla mersûm Marat zimmî bin iki yüz on beş senesine mahsûben medîne-i Üsküdar’a muzâfe Kartal ve Adalar cizyesi uhde-i iltizâmında olup cibâyet-ine irsâl eylediği kimesne dört ay mürû[ru]nda fevt olmağla mal bakāyâsını tahsîle beni irsâl ve bakāya-yı mezkûreden sekiz ay müddetde on bin guruş tahsîl ve kendiye teslîm etmemle müddet-i mezkûreden iktizâ eden ecr-i mislim ile malımdan masrûfum olan sekiz yüz guruşu mersûm Marat zimmîden hâlâ taleb ederim deyü da‘vâ eylediğimde ol dahi cevâbında ber-vech-i muharrer müdde‘âmı inkârından mâ‘adâ sen cibâyet-i mezkûreyi çukacılar hanında Sarraf Agob nâm zimmîden on bin yedi yüz seksen yedi buçuk guruşa iltizâm ve yedine işbu bir kıt‘a deyn temessükünü i‘tâ eylediğinden sonra zahr-ı temessükte olan teslîmatdan mâ‘adâ bâkī kalan iki bin üç yüz elli guruşu mesfûr Agob zimmîye sen ver ben sana veririm deyü bana emr etmekle ben dahi emrine binâen meblağ-ı bâkī-i mezkûru mesfûr Agob zimmîye def‘ ve teslîm etmemle bi’l-mürâca‘a taleb ederim deyü benden da‘vâ ben dahi inkâr edip bu vechile beynimizde münâza‘ât-ı kesîre vâkı‘a olmuşdu el-hâletü hâzihi tavassut-ı muslihîn ile beynimiz ıslâh olunmağın her birimiz âhardan tasaddî eylediğimiz da‘vâ-yı mezkûrelerimizden fâriğler olup bi’l-cümle husûs-ı mezkûra müte‘allika âmme-i da‘vâdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-13 min-Şevvâl sene [1]216