İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 121 Hüküm no: 84 Orijinal metin no: [11a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devatçılar kalfası Halil b. İbrahim’in dükkan açıp mesleğini icra etmesine engel olunmaması gerektiği Devatçı dükkânı küşâdına izin Ma‘rûz Devatçılar kalfalarından Halil b. İbrahim meclis-i şer‘-i münîrde esnâf-ı mezkûre kethüdâsı es-Seyyid el-Hâc Mustafa ve ustalarından Mehmed ve Mustafa ve İbrahim ve Halil ve Mahmud ve Abdullah ve İsmail ve Mehmed nâm kimesneler muvâcehelerinde ben esnâf-ı mezkûre ustası oğlu olup san‘at-ı mezkûrede pîr ü perver kalfa olmamla ücretle usta yanında san‘at-ı mezkûreyi i‘mâl murâd eylediğimde kalfanın bize lüzumu yokdur deyü meclis-i şer‘de her biri ibâ vü imtinâ‘ edip ve ben müstakillen dükkân küşâd irâdesinde olmamla dükkân küşâdıma mümâna‘at etmemek üzere kethüdâ-yı merkūma tenbîh olunması murâdımdır dedikde onlar dahi cevâblarında müdde‘î-i merkūm takrîr-i meşrûhunda tasdîk etmeleriyle ve hasr-ı bey u şirâ gayr-ı meşrû‘ ve mukaddemâ şeref-rîz-i sudûr olan hatt-ı hümâyûn-ı adalet-makrûn ile memnû‘ olmağla merkūm Halil müstakillen dükkân küşâd edip keyfe mâ yeşâ san‘atını i‘mâline ve ahz u i‘tâsına mümâna‘at etmemek üzere her birine ba‘de’t-tenbîh ol vechile ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-23 min-Şevvâl sene [1]216