İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 120 Hüküm no: 83 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengiler kolbaşısı Yusuf b. Süleyman ile Mühtedî Osman b. Abdullah’ın alacak hususunda birbirlerinin zimmetlerini ibrâ ettikleri Me’hûzuna kefîl Ma‘rûz İstanbul’da Tahtakale kurbünde Katır Hânında sâkin çengiler kolbaşısı Yusuf b. Süleyman meclis-i şer‘-i münîrde Mühtedî Osman b. Abdullah nâm şâbb-ı emred muvâcehesinde mezbûr Osman benden mukaddem gāib ani’l-beled Köçekçi es-Seyyid Ahmed’in yanında iken işbu üzerinde lâbis olduğu bir nimten ve bir çuka mâî cübbe ve bir çuka şalvar semenlerinden gāib-i mezbûra deyni olan yüz altmış guruşu bi-şartü’r-rücû‘ emriyle gāib-i mezbûra ben edâ ve teslîm etmemle meblağ-ı mezkûru bi’l-mürâca‘a taleb ederim deyü tasaddî eylediğim da‘vâmdan meccânen fâriğ olup husûs-ı mezkûra müte‘allika da‘vâdan ben mezbûr Osman’ın zimmetini ibrâ ve iskāt eylediğimden sonra eğer gāib-i mezbûr ba‘de zamânin zuhûr ve meblağ-ı mezkûru benden ahzımı inkâr ile mezbûr Osman’dan da‘vâ ve şer‘an bir nesne ahz ederse mikdâr-ı me’hûzuna ben kefîl ve zâminim dedikde ol dahi ibrâ ve kefâletini kabûl eylediği İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâli’l-mükerrem sene 1216