İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 122 Hüküm no: 86 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed Çavuş b. Seyyid Mehmed ile Duhânî Hüseyin b. Hasan’ın alacak hususunda birbirlerinin zimmetlerini ibrâ ettikleri Ma‘rûz Dîvân-ı âlî çavuşlarından sâhib-i arzuhâl es-Seyyid Ahmed Çavuş b. es-Seyyid Mehmed meclis-i şer‘-i münîrde Duhânî Hüseyin b. el-Hâc Hasan mahzarında merkūm Hüseyin gāib ani’l-meclis Kağıtçı İsak Yahûdi’ye deyni olan bin guruş mukābelesinde İslâmbol’da Samatyakapısı dâhilinde vâki‘ bir bâb tütüncü dükkânı derûnunda mevcûde mülkü olan gedik âlâtını Yahûdi-i mersûma bi-tarîkı’l-istiğlâl bey‘ ve teslîm ettikden sonra merkūm Hüseyin deyn-i mezkûrumu malından edâ ve âlât-ı mezkûreyi fek ve tahlîs ile ba‘dehû ben sana edâ ederim deyü bana emr etmekle ben dahi malımdan bi-tarîkı’s-sulh Yahûdi-i mersûma altı yüz elli guruş verip âlât-ı mezkûreyi tahlîs etmişdim el-hâletü hâzihi medfûum olan meblağ-ı mezkûr altı yüz elli guruşu mezbûr Hüseyin’den bi’l-mürâca‘a hâlâ talep ederim deyü tasaddî eylediğim da‘vâmdan meccânen fâriğ olup husûs-ı mezkûra ve işbu târih-i i‘lâma gelince beynimizde cereyân eden cemî‘-i ahz u i‘tâya müte‘allika âmme-i de‘âvî ve kâffe-i mütâlebâtdan ben mezbûr Hüseyin ile oğlu işbu hâzır bi’l-meclis Hasan’ın zimmetlerini ibrâ-yı âmm ile ibrâ ve iskāt eylediğimde onlar dahi işbu târih-i i‘lâma gelince beynimizde cereyân eden cemî‘-i ahz u i‘tâya müte‘allika âmme-i de‘âvî ve kâffe-i mütâlebâtdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü takrîrini mezbûr Hüseyin ve oğlu hâzır-ı merkūmdan her biri tasdîk ve bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-23 min-Şevvâli’l-mükerrem sene 1216