İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 122 Hüküm no: 87 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Panayot v. Anesti’nin, Kınan v. Angeli’ye olan borcunu ödemesi gerektiği 556 guruş hüküm Ma‘rûz Dülger kalfalarından Kınan v. Angeli zimmî meclis-i şer‘-i münîrde Dülger Panayot v. Anesti zimmî muvâcehesinde mersûm Panayot zimmî zimmetinde cihet-i karzdan altı yüz guruş alacağım olup hatta mersûm Panayot zimmî meblağ-ı mezkûr cihet-i merkūmeden bana deyni olduğunu ikrâr ve yedime işbu bir kıt‘a rûmiyyü’l-ibâre deyn temessükünü i‘tâ eylediğinden sonra meblağ-ı mezkûrun kırk dört guruşunu bundan akdem bana edâ etmekle bâkīsi olan beş yüz elli altı guruşu hâlâ taleb ederim deyü da‘vâ ettikde ol dahi cevâbında mukaddemâ altı yüz guruş deynimdir deyü ikrâr ve temessük verdiğini i‘tirâf edip lâkin meblağ-ı mezkûrun beş yüz guruşu sahîhan deynim olup ve yüz guruşu dahi bilâ-devr ribâ-yı mahz olduğundan mâ‘adâ ben meblağ-ı mezkûr beş yüz guruşu târih-i i‘lâmdan on üç sene mukaddem müdde‘î-i mersûmdan iktirâz edip meblağ-ı mezkûrun bilâ-devr ribhi olarak on senede kendiye yedi yüz elli guruş vermemle meblağ-ı mezkûrun beş yüz guruşu deyn-i mezkûruma ba‘de’t-takās bâkīsi olan iki yüz elli guruşu istirdâd ederim deyü da‘vâ ettikde mersûm Kınan zimmî mesfûr Panayot zimmîden mukaddemâ yedi yüz elli guruş ribh ahzını ve ribâ müdde‘âsını inkâr etmekle mesfûr Panayot zimmîden ber-minvâl-i muharrer müdde‘âlarına beyyine taleb olundukda ityân-ı beyyineden ızhâr-ı acz ve istihlâf etmekle mersûm Kınan zimmîye vech-i şer‘î üzere yemîn verilmeğin mûcebince mesfûr Panayot zimmî yedi yüz elli guruş ribâ medfû‘ ve yüz guruş murâbaha da‘vâlarına mersûm Kınan zimmîye bilâ-beyyine mu‘ârazadan ba‘de’l-men‘ ikrâr u i‘tirâfı mûcebince meblağ-ı bâkī-i mezkûr beş yüz elli altı guruşu müdde‘î-i mersûm Kınan zimmîye edâ ve teslîme mesfûr Panayot zimmîye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-Şevvâli’l-mükerrem sene 1216