İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 130 Hüküm no: 99 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Kostandi’nin, İskender v. Aleksandır’a olan borcunu ödemesi gerektiği Ma‘rûz Arzuhâlde mastûr İskender v. Aleksanderi meclis-i şer‘-i münîrde arzuhâl eden Nikola v. Kostandi zimmî muvâcehesinde ben ve şerîkim gāib ani’l-beled Seleli Todori v. Aleksanderi nâm zimmî mâl-ı şirketimizden olmak üzere ma‘an mersûm Nikola zimmîye bey‘ ve teslîm eylediğimiz ma‘lûmü’l-mikdâr Şam metâ‘ı semeninden alacağımız olan iki bin beş yüz kırk guruşdan benim hisseme isâbet eden bin iki yüz yetmiş guruş ki beş yüz guruşunu bana edâ etmekle bâkīsi olan yedi yüz otuz guruşu bi’l-asâle ve şerîkim gāib-i mersûmun hissesine isâbet eden bin iki yüz yetmiş guruşu dahi kabza şerîkim mersûm işbu yedimde olan mektûb mantûkunca tarafından beni tevkîl etmekle meblağ-ı mezkûr bin iki yüz yetmiş guruşu dahi bi’l-vekâle mesfûr Nikola zimmîden taleb ederim deyü da‘vâ ettikde ol dahi cevâbında müdde‘î-i mersûm ile şerîki gāib-i mesfûrûna ol mikdâr guruşluk emti‘a iştirâ ve kabzını ve meblağ-ı mezkûrdan hissesine isâbet eden bin iki yüz yetmiş guruşdan beş yüz guruşunu edâ etmekle bâkī yedi yüz otuz guruş müdde‘î-i mersûma el-yevm zimmetinde deyni olduğunu ikrâr ve ber-vech-i muharrer vekâlet müdde‘âsını inkâr etmekle müdde‘î-i mersûm İskender zimmî ber-vech-i muharrer vekâlet müdde‘âsını beyâna ba‘de’l-havâle mesfûr Nikola zimmînin ikrârı mûcebince meblağ-ı bâkī-i mezkûr yedi yüz otuz guruşu müdde‘î-i mersûm İskender zimmîye edâsıyla mesfûr Nikola zimmî ilzâm olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-Şevvâli’l-mükerrem sene [1]216