İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 129 Hüküm no: 98 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Mağrovic’in, Tülbentçi Estefan v. Ağyazer’in vârislerinin zimmetini ibra ettiği Ma‘rûz Bundan akdem hâlik olan Tülbentçi Estefan v. Ağyazer v. Ohan zimmînin verâseti li-ebeveyn kız karındaşı Beyzat ve Sara ve Maryem ile li-ebin er karındaşı Sergiz zimmîye ba‘de’l-inhisâr arzuhâl eden Karabet v. Mıgırdıç zimmî bi’t-terâzi meclis-i şer‘-i münîrde verese-i mersûmûndan mesfûre Sara Nasrâniye tarafından husûs-ı âtî’l-beyânda vekîl olduğu Serkiz v. Ağyazer ve Artin vMıgırdıç. zimmî şehâdetleriyle sâbit ve verese-i sâire-i mesfûrûn taraflarından tasdîka vekîlleri olan Agob v. Estefan zimmî muvâcehesinde ben ücretle hizmet eder makūleden olmamla bundan üç sene mukaddem hâlik-i mesfûre hayatında yüz yirmi beş ay hizmet etmemle müddet-i mezkûrede iktizâ eden ecr-i mislimin yedi yüz guruşunu hayatında bana edâ etmekle bâkī ecr-i mislimin tekmîlini taleb ederim deyü tasaddî eylediğim da‘vâmdan bâ-vasâtat-ı muslihîn verese-i mersûmûn ile kat‘an li’n-nizâ‘ iki yüz elli guruş üzerine sulh olduğumda onlar dahi sulh-i mezkûru kabûl ve bedel-i sulh-ı mezkûru bana teslîm etmeleriyle ziyâde ecr-i mislime ve bi’l-cümle husûs-ı mezkûra ve sâire müte‘allika âmme-i da‘vâdan hâlik-i mersûm ile veresesi müvekkilûn-ı mersûmûnun zimmetlerini ibrâ-yı âmm ile ibrâ ve iskāt eylediğimde onlar dahi ibrâmı kabûl eylediler deyü takrîrini vekîl-i mesfûr tasdîk eylediği İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâl sene [1]216