İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 131 Hüküm no: 101 Orijinal metin no: [13a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. İsmail ile boşandığı eşi Ayşe bt. Abdullah’ın birbirlerinde haklarının kalmadığı Ma‘rûz Kalyon çavuşlarından Mustafa Çavuş b. İsmail meclis-i şer‘-i münîrde zevce-i mutallakası ve zâtı mu‘arrefe olan Âişe bt. Abdullah nâm Hatun muvâcehesinde Kâtib Hüsrev Vakfı’na li-ecli’l-maslaha kāimmakām-ı mütevellî nasb olan Mahmud Efendi hâzır olduğu hâlde İstanbul’da Kumkapı kurbünde İbrahim Paşa nâm-ı diğer Muhsine Hatun Mahallesi’nde vâki‘ ma‘lûmü’l-hudûd ve’l-müştemilât vakf-ı mezbûr musakkafâtından bir bâb menzile Hatice bt. Abdullah mutasarrıfe iken dört yüz otuz guruş bedel mukābelesinde ben tefevvüz ve nısf-ı menzili benimle ölünce geçinmek şartıyla zevcem Âişe Hatun’a mütevellî-i vakf Mehmed Sâdık re’yiyle ferağ ve tevfîz etmişdim lâkin şart-ı mezkûr ile ferağ-ı sahîh ve mu‘teber olmamağla nısf-ı menzil-i mezkûru bâ-re’y-i mütevellî geri taleb ederim deyü da‘vâ eylediğimde ol dahi inkâr ve beynimizde ba‘de vukū‘ı’l-münâza‘a bâ-tavassut-ı muslihîn mezbûre Âişe Hatun nısf-ı menzil-i mezkûru doksan beş guruş bedel mukābelesinde bâ-re’y-i mütevellî bana ferağ ve tefvîz ben dahi tefevvüz ve kabûl eylediğimden sonra bedel-i mezkûrun istîfâsına ve nısf-ı menzile müte‘allika biribirimiz ile da‘vâ ve nizâ‘ım yokdur deyü takrîrini mezbûre Âişe Hatun tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî-29 min-Şevvâli’l-mükerrem sene [1]216