İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 159 Hüküm no: 140 Orijinal metin no: [18b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Abdullah’ın, kocası İsmail b. Mehmed’e itâat etmesi gerektiğinin tenbihi Ma‘rûz İsmail b. Mehmed nâm kimesne meclis-i şer‘-i münîrde hâlâ zevcesi zâtı mu‘arrefe Nefise bt. Abdullah nâm Hatun mahzarında mezbûre Nefise Hatun yüz guruş mehr-i müeccel ve kırk guruş mu‘accel-i müstevfâsıyla zevce-i medhûlün-bihâm iken nâşizeten menzilimden firâr etmekle zevcem mezbûreye suâl olunup menzilime gelip bana itâ‘at ve hukūk-ı zevciyete mürâ‘atına zevcem mezbûreye tenbîh olunması murâdımdır deyü da‘vâ ettikde mezbûre Nefise Hatun cevâbında müdde‘î-i merkūm zevc-i dâhili olup mehr-i mu‘acceleyi istîfa eylediğini ve nâşizeten âhar mahalde sâkine olduğunu bi-tamâmihî ikrâr u i‘tirâf etmeğin mûcebince zevci merkūmun menziline varıp itâ‘at ve hukūk-ı zevciyete mürâ‘at etmek üzere mezbûre Nefise Hatun’a tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-9 min-Zilka‘de sene 1216