İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 158 Hüküm no: 139 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mustafa’nın, Sofi oğlu Mehmed’den satın aldığı cariyenin ayıplı olduğu iddiasını ispat edemediği Ma‘rûz Sâhib-i arzuhâl Mâ‘cûnî Ahmed b. Mustafa nâm kimesne meclis-i şer‘-i hatîrde esirci tâifesinden arzuhâlde mezkûr Sofuoğlu Mehmed b. Ahmed nâm kimesne muvâcehesinde târih-i i‘lâmdan dört ay mukaddem mezbûr Mehmed’den cemî‘-i uyûbdan sâlime olmak üzere dört yüz elli guruş semen-i medfû‘ ve makbûza iştirâ ve kabz eylediğim işbu hâzırati bi’l-meclis Zenciye Fâtıma’nın hayzı illeti ve karnında şiş olduğuna bu esnâda ben vâkıf olup illet-i mezkûre câriye-i mezbûrede hîn-i bey‘de mevcûde ve kadîm ve inde’t-tüccâr noksan-ı semen icâb eder uyûbdan olmağla redd-i mebî ve istirdâd-ı semen murâdımdır deyü da‘vâ ettikde evvelâ teveccüh-i husûmet için câriye-i mezbûre bu misillü uyûbu teşhîse bâ-fermân-ı âlî ehl-i hibre ta‘yîn buyrulan hazzâk-ı etibbâdan İbrahim Efendi ve Salih Efendi’ye irsâl ve irâe olundukda onlar dahi ba‘de em‘âni’n-nazar meclis-i şer‘a gelip câriye-i mezbûrede el-yevm illet-i mezkûreler mevcûd değildir deyü bi’l-muvâcehe haber vermeleriyle teveccüh-i husûmet bulunmamağın müdde‘î-i mezbûr Ahmed’in da‘vâ-yı mezkûresi mesmû‘a olmayıp bî-vech-i şer‘î mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene [1]216