İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 159 Hüküm no: 142 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğramacı kalfalarının dükkân açmalarına izin verildiği Doğramacı kalfalarının dükkân küşâdlarına dâir Ma‘rûz Doğramacı esnâfı kalfalarından Artin v. Agob ve Melkon v. Agob ve Kirkor v. Zador ve Ohan v. Serkiz ve Ohannes v. Agob ve Kasber v. Agob ve Sahak v. Kazer ve Haçador v. Abraham ve Hacar v. Bedros ve Kirkor v. Serkiz ve Mıgırdıç v. Parsah ve Artin v. Manok ve Ağya v. Mıgırdıç ve Parsam v. Mıgırdıç ve Kazer v. Ohan ve Manok v. Manok nâm zimmîler meclis-i şer‘-i münîrde esnâf-ı mezkûre kahyası Karabet v. Avadik ve ustalarından Ağya v. Artin ve Serkiz ve Panayot ve Artin nâm zimmîler muvâcehelerinde bizler doğramacılık san‘atını tahsîl ve tekmîl ve âdet-i esnâf üzere düstûr alıp müstakillen dükkân küşâdıyla doğrama i‘mâline kādirler ve kisb ve ticârete liyâkatlerimiz bâhir iken mersûmûn ustalar muktezâ-yı nizâm-ı esnâf ziyâde dükkân küşâd olunmaz ma‘iyetimizde ücret ile hizmet edin deyü bize hilâf-ı şer‘-i şerîf cebr ve men-i inhisâr-ı bey‘ u şirâ hatt-ı hümâyûnuna mugāyir bizleri müstakillen dükkân küşâdıyla kisb ve ticâretimize mümâna‘at etmeleriyle bâ-fermân-ı âlî her birlerimize müstakillen dükkân küşâdına izin ve ruhsat buyrulmak matlûbumuz dediklerinde doğramacı ustaları cevâblarında mersûmûn kalfaları cemî‘-i kelimâtlarında tahkīk ve tasdîk edip ancak ziyâde dükkân küşâdı ve gedik ihdâsı hilâf-ı nizâm-ı esnâf olmağla bir vechile râzı olmayız deyü hilâf-ı şer‘-i mutahhar cevâba tasaddî etmeleriyle husûs-ı mezkûr kisb ve ticâret makūlesinden olup kimesneyi kisb ve ticâretden men‘ ve gayr-ı meşrû‘ ve men‘-i inhisâr-ı bey‘ u şirâ bâbında şerefrîz-i sudûr eden hatt-ı hümâyûn ile merfû‘ olduğundan mâ‘adâ ehl-i sanâyi‘in kesret ve vefreti sebebiyle metâ‘larının kıymetleri elbette tenezzül edeceği zâhir ve âşikâr olup ol vechile dahi ibâdullâha enfa‘ ve evlâ olduğu bedîdâr olmağın mersûmûn on altı nefer doğramacı kalfaları Âsitâne-i aliyyede ve bilâd-ı selâsede murâd eyledikleri mahallerde müstakillen dükkân küşâdına izin ve ruhsatı hâvi yedlerine tuğralı emr-i âlî inâyet ve ihsân ve Başmuhâsebe’ye ilmühaberi i‘tâ olunmak bâbında emr u fermân hazret-i veliyyü’l-emrindir. Fi’l-yevmi’s-sâbi‘ min-Zilka‘deti’ş-şerîfe li-sene sitte aşara ve mi’eteyn ve elf.