İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 160 Hüküm no: 143 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Dimitri’nin, şerbetçi Nikola v. Anton aleyhine açtığı davanın reddedildiği Mesmû‘a olmadığı Ma‘rûz Dülger kalfalarından arzuhâl eden Manol v. Dimitri zimmî meclis-i şer‘-i münîrde arzuhâlde mastûr Şerbetçi Nikola v. Anton zimmî muvâcehesinde mesfûr Nikola zimmî gediğine mutasarrıf olduğu İslâmbol’da Balatkapısı hâricinde Karabaş Mahallesi’nde kâin Şâbu şerbethânesi demekle ma‘rûf bir bâb şerbethâneyi emriyle binâ esnâsında mersûm Nikola zimmînin bi-şartü’r-rücû‘ emriyle âhardan iştirâ ve sarf eylediğim enser ve kereste ve tuğla ve kirec ve ücret-i ameleden bâkī cem‘an bin dört yüz guruşu sen ver ben sana veririm deyü bana emr etmekle ben dahi enserciye olan üç yüz seksen guruş ve tuğlacıya elli guruş ve kireçciye olan on sekiz guruş ki cem‘an dört yüz kırk sekiz guruşu el-yevm edâ etmeyip mâ‘adâsı olan dokuz yüz elli guruşu malımdan edâ etmemle medfû‘um olan meblağ-ı mezkûru bi’l-mürâca‘a taleb ederim deyü da‘vâ ettikde ol dahi cevâbında müdde‘î-i mersûma ber-vech-i muharrer emrini inkârından mâ‘adâ mersûm işbu sene-i mübâreke Rebî‘ülâhiri’nin yirmi üçüncü günü müderrisîn-i kirâm zevi’l-ihtirâmdan hâlâ Bâb Mahkemesi Nâibi Mehmed Râşid Efendi’nin huzûrunda zikr olunan şerbethâneyi îcâreteyn ile mutasarrıf olan gāib ani’l-meclis Berber Hüseyin’in bi-şartü’r-rücû‘ emriyle binâ etmişdim lâkin gediği mersûm Nikola’nın olmağla mücerred gediğine mutasarrıf olduğuna binâen masrûfum olan iki bin guruşu taleb ederim deyü benden da‘vâsı takrîr-i meşrûhu üzere iltifâta şâyân olmamağla bana mu‘ârazadan men‘ ve yedime işbu bir kıt‘a i‘lâm-ı şer‘î i‘tâ olunmağla bu def‘a benden ber-vech-i muharrer da‘vâsı tenâkuz olmuşdur deyip ve müdde‘î-i mersûm mazmûn-ı i‘lâm-ı mezkûru tasdîk lâkin mukaddemâ vech-i muharrer üzere olan da‘vâm muvâza‘a tarîkiyle olmuşdu deyip lâkin muvâza‘ayı tefsîr ve beyâna kādir olmamağla müdde‘î-i mersûm Manol zimmînin bu def‘a olan da‘vâsı da‘vâ-yı evveline münâkız olmağla mesmû‘a olmadığı İslâmbol Mahkemesi’nden huzûr-ı âlîlerine i‘lâm olundu. Fi’l-yevmi’s-sâbi‘ min-Zilka‘deti’ş-şerîfe li-sene sitte aşare ve mi’eteyn ve elf.