.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 120
Hüküm no: 126
Orijinal metin no: [19b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Şeyh Muhammed Efendi’nin bağını Şeyh Mehmed Efendi’ye sattığı

Diyâr-ı Mağrib’de cezîre-i Cerbe’de Hamt-i Mahbûbeyn’de? Mihrab Mahallesi’nde sâkin Muhammed b. Said nâm kimesne mahfil-i şer‘-i şerîfde sâhibü’l-kitâb Şeyh Mehmed Efendi b. Abdülmümin mahzarında bi’t-tav‘i’s-sâf ikrâr u i‘tirâf edip mahalle-i mezbûre kurbünde kapı altında vâki‘ şark tarafından Fakih Süleyman b. Yusuf mülkü kıble tarafından Fakih İbrahim b. İsmail mülkü garb tarafından vâlidem Mümine Hatun ve ba‘zan mezbûr Fakih İbrahim mülkleri ve şimâl tarafından yine vâlidem mezbûre Mümine Hatun mülkü ile mahdûd ve mümtâz mülk-i müşterâm bir mikdârı mülk-i mevhûbum olup eşcâr-ı müsmire ve gayr-ı müsmireyi hâvî olan bir kıt‘a bağımı bey‘-i bâtt-ı sahîh-i şer‘î ile yirmi üç riyâlî guruş ile adedi gayr-ı ma‘lûm bir kabza fülûsa mezbûr Şeyh Mehmed Efendi’ye bey‘ edip ol dahi iştirâ ve kabûl eyleyip semen-i mersûmu yedinden ahz ü istîfâdan sonra zikr olunan bağı mahallinde kabz ve teslîme mezbûru teslît eyledim, ba‘de’l-yevm benim alâka ve medhalim kalmayıp mülk-i müşterâsı olmuşdur, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb sebt ü ketb olundu.

Fi’s-sâdis aşer min-Zilka‘deti’ş-şerîfeti’l-harâm min-şühûr li-sene selâse ve sittin ve elf.

Şuhûdü’l-hâl: Fakih Ebu’l-Kasım b. Arus, Fakih Yusuf b. Halîfe, Şeyh Ebu’l-Kasım b. Salih, Süleyman Reis b. Ömer ve gayruhum mine’l-huzzâr.