.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 120
Hüküm no: 125
Orijinal metin no: [19b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. el-Hâc Mustafa ile Mehmed Çelebi’nin muhalaa yoluyla boşandıkları

Husûs-ı âti’z-zikrin mahallinde tahrîr olunması iltimâs olunmağın savb-ı şer‘-i kavîmden mevlânâ Abdulkādir Efendi irsâl olunup ol dahi mahmiye-i İstanbul’da Mi‘mar Abbas Mahallesi’nde Fâtıma bt. el-Hâc Mustafa’nın sâkine olduğu menziline varıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i mutahhar eyledikde mezbûre Fâtıma Hatun meclis-i mezbûrda zevci işbu râfi‘u’l-kitâb Mehmed Çelebi b. el-Hâc Nurullah mahzarında ikrâr ve takrîr-i kelâm edip zevcim mezbûr Mehmed Çelebi ile ma‘kūdün-aleyh olup zimmetinde mütekarrer olan sekiz bin akçe mehr-i müeccelim ve nafaka-i iddet ve meûnet-i süknâm üzerine muhâla‘a-i sahîha-i şer‘iyye ile hul‘ ve hukūk-ı zevciyete müte‘allika de‘âvîden zimmetini ibrâ ve ıskāt eyledim deyip mezbûr Mehmed Çelebi ben dahi zevcem mezbûre Fâtıma ile vech-i muharrer üzere hul‘ edip zimmetini hukūk-ı zevciyete müte‘allika de‘âvîden ibrâ ve ıskāt eyledim deyip ehadühümâ âharı vicâhen ve şifâhen tasdîk ve tahkīk eylemeğin vâki‘ hâli mevlânâ-yı mezbûr mahallinde tahrîr ve meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a kaydolundu.

Fi’l-yevmi’s-sâmin min-Zilka‘deti’ş-şerîfe sene selâse ve sittin ve elf.

Şuhûdü’l-hâl: Ali Efendi b. Hayreddin, Mehmed Ağa b. İbrahim, Osman Bey b. Mustafa, Ali Beşe b. Mehmed.