İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 209 Hüküm no: 216 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabun tüccarı Seyyid Hasan b. Ali’nin, Girid adasından İstanbul’a sabun getiren tüccardan Hüseyin Ağa ve diğerlerine olan borcunu ödemesi gerektiği Sabun tüccârının 15.077 guruş 33 para hüküm Ma‘rûz Âsitâne-i aliyye’ye Cezîre-i Girid’den sabun celb ve ibâdullâha bey‘ eden tüccârdan han ağası demekle ma‘rûf Hüseyin Ağa ve damadı Mehmed Ağa ve Tiryâkîoğlu Mustafa ve Suhtezâde İbrahim Ağa ve Çavuşoğlu Molla Mehmed ve Kuklakî Mustafa Ağa ve Tarakçıoğlu Derviş Ali ve Mehmed Ali ve Kamariyeli el-Hâc Ali ve Yeğenzâde el-Hâc Mehmed Ağa ve Topçu Hasan Ağa ve Yeğenzâde Molla Mehmed ve İmâmoğlu Molla Derviş ve Mücellid Mehmed Emin Ağa ve Romalı Molla Mehmed nâm kimesnelerin Zindânkapısı dâhilinde Sabuncu es-Seyyid Hasan b. es-Seyyid Ali zimmetinde otuz bir bin yüz yirmi yedi guruş otuz üç para bâ-i‘lâm-ı şer‘î mahkûmun-bih alacakları olduğu mukaddemâ mezbûr es-Seyyid Hasan’ın ikrârıyla sâbit olmağla mezbûr es-Seyyid Hasan deyn-i mezkûrunu edâ için bi’t-taleb habse ilkā olunup bir müddet mahbûs oldukdan sonra deyn-i mezkûrunu edâ için yedinde olan emti‘a ve mahâll-i mezkûrda vâki‘ birbirine muttasıl üç bâb dekâkîn gediklerini bey‘ ve edâ-yı deyn eyle deyü bi’d-defa‘ât tenbîh ve tazyîk olundukda inâden bey‘ etmemekle verilen fetâvâ-yı şerîfe mûcebince mezbûrun emti‘a ve gedik âlâtını vefâ etmez ise akarını semen-i misilleriyle taraf-ı şer‘den âhara bey‘ ve edâ-yı deyn iktizâ eylediği bundan akdem i‘lâm ve mûcebince musahhih ve mufassal fermân-ı âlîşân dahi sâdır oldukdan sonra mezbûr es-Seyyid Hasan ashab-ı düyûn-ı mezbûrûn ile hesâbları ma‘rifet-i şer‘le rü’yet olunmasını istid‘â etmekle tekrar hesâbları hesab-ı sahîh ile rü’yet eylediklerinde müdde‘ûn-ı mezbûruna ba‘de’t-teslîmât iki kıt‘a i‘lâm ile otuz iki bin üç yüz on dört guruş on dört para ve İzmir tüccârından Hüseyin Ağa ve es-Seyyid el-Hâc Mustafa Ağa ve diğer el-Hâc Mustafa ve Hâfız Mehmed nâm kimesnelere dahi sabun semeninden bâ-i‘lâm iki bin altı yüz seksen altı guruş on yedi para deyni olduğu lede’l-murâfa‘a ikrâr u i‘tirâfıyla şer‘an sâbit olmağla cem‘an deyni olan otuz beş bin beş yüz guruşun edâsı için imtisâlen li’l-emri’l-âli mezbûr es-Seyyid Hasan’ın mahâll-i mezkûrda vâki‘ birbirine muttasıl üç bâb dükkânları derûnlarında mevcûde bulunup ma‘rifet-i şer‘le bey‘ olunan ma‘lûmü’l-vezn sabun semeni olan bin üç yüz otuz bir buçuk guruş ve sabun tuzu semeni olan iki yüz kırk altı guruş on altı para ve pirinç semeni olan seksen yedi guruş beş para ile üç aded çekmeceleri<> derûnunda zuhûr eden altmış dört guruş otuz yedi para ki cem‘an bin yedi yüz yirmi dokuz guruş otuz sekiz para ve mârru’z--zikr üç bâb dükkân derûnlarında mevcûde beyne’l-hıref gedik tâ‘bir olunan âlât-ı lâzıme-i ma‘lûmeleri sûk-ı Sultânîde ba‘de’l-müzâyede ve inkitâü’r-rağbe el-yevm semen-i misilleri olduğu ihbâr olunup kıbel-i şer‘den bâ-hüccet-i şer‘iyye âhara bey‘ olunan âlât-ı lâzıme-i ma‘lûme semenleri olan on sekiz bin guruş ki min haysü’l-mecmû‘ on dokuz bin yedi yüz yirmi dokuz guruş otuz sekiz para dâyînleri mezbûrûn alacaklarına mahsûben teslîm onlar dahi ahz u kabz ve her biri alacaklarına mahsûben beynlerinde iktisâm eylediklerinden sonra ashâb-ı düyûn-ı mezbûrûn meclis-i şer‘de mezbûr es-Seyyid Hasan muvâcehesinde mezbûr es-Seyyid Hasan zimmetinde mahkûmun-bih hakkımız olan cem‘an otuz beş bin beş yüz guruşdan bâkī kalan on beş bin yedi yüz yetmiş guruş otuz üç parayı dahi taleb ederiz deyü da‘vâ eylediklerinde mezbûr es-Seyyid Hasan dahi kaziyye minvâl-i meşrûh üzere olduğunu ve meblağ-ı bâkī-i mezkûr beş bin yedi yüz yetmiş guruş otuz üç parayı müdde‘ûn-ı mezbûrûna el-yevm zimmetinde sahîhan deyni olduğunu bi-tamâmihî ikrâr u i‘tirâf etmeğin alâ-mûceb-i ikrârihi meblağ-ı bâkī-i mezkûr on beş bin yedi yüz yetmiş guruş otuz üç parayı dahi müdde‘ûn-ı mezbûrûna edâ ve teslîme mezbûr es-Seyyid Hasan’a tekrar tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-28 min Za sene [1]216