İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 278 Hüküm no: 309 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdurrahman ve eşi Hatice bt. Abdullah’ın, kiracıları Ahmed Ağa b. Mehmed Ârif’i tütüncü dükkânından çıkarmamaları gerektiği Tütüncü dükkânı niza‘ı mu‘ârazadan men‘ Ma‘rûz Derûn-ı arzuhâlde mezkûrü’l-ism es-Seyyid Ahmed b. Abdurrahman ve zevcesi mu‘arrefetü’z-zât Hatice bt. Abdullah nâm hatun meclis-i şer‘-i enverde sâhib-i arzuhâl Ahmed Ağa b. Mehmed Ârif muvâcehesinde İstanbul’da Kocamustafapaşa Mahallesi’nde vâki‘ bi’l-îcâreteyn mutasarrıf olduğumuz mahalle-i mezbûre avârızı vakfından ma‘lûmü’l-hudûd bir bâb vakf menzilin tahtında kâin Abdüllatif Ağa dükkânı demekle arîf dört kepenk bir bâb tütüncü dükkânında mezbûr Ahmed Ağa beher mâh yüz para icâre tesmiyesiyle müşâhereten müstecirimiz ve dükkân-ı mezkûrun derûnunda olan gedik âlâtı maden kaleminde bâ-fermân-ı âlî mukayyed duhâncı gediklerinden olmak üzere mezbûr Ahmed Ağa’nın yedinde mülk olup lâkin dükkân-ı mezkûrun bize eşedd-i lüzûmu olmağla bu sûretde gediğini âhar mahalle nakli şürût-ı nizâmlarından olduğuna binâen dükkân-ı mezkûru hedm ve menzilimize ilhâk için işbu târih-i i‘lâm-ı şehri gāyetinde fesh-i akd-i îcâr etmemizle şehr-i mezbûr gāyetinde dükkân-ı mezkûru tahliyye ve bize teslîme mezbûr Ahmed Ağa’ya tenbîh olunmak matlûbumuzdur deyü da‘vâ ettiklerinde ol dahi ber-vech-i muharrer müstecirleri olduğunu ikrâr lâkin dükkân-ı mezkûrun zevcân-ı mezbûrâna eşedd-i lüzûmu olduğunu tasdîk etmemekle istikşâf-ı hâl için kıbel-i şer‘den mürsel kâtib el-Hâc Mehmed Efendi dâ‘îleri menzil-i mezbûra varıp mütevellî-i vakf-ı mezbûr es-Seyyid el-Hâc Ahmed Efendi hâzır olduğu hâlde cerîdede mazbûtü’l-esâmî bî-garaz Müslimîn ile lede’l-mu‘âyene menzil-i mezkûrun dâhili vâsi‘ ve dükkân-ı mezkûrun menzil-i mezbûra eşedd-i lüzûmu olmadığı zâhir olduğundan mâ‘adâ dükkân-ı mezkûrun hedmi cânib-i vakfa muzır olduğunu dahi muslimûn-ı merkūmûn tarefeyn muvâcehelerinde ihbâr eylediklerinden sonra beynlerine muslihûn tavassut edip zevcân-ı mezbûrân dükkân-ı mezbûru şehr-i âtî Saferi’l-hayr gurresinden kemâkân beher şehr yüz paraya mezbûr Ahmed Ağa’ya îcâr ol dahi ba‘de’l-istîcâr zevcân-ı mezbûrân bilâ-mûceb mezbûr Ahmed Ağa’yı dükkân-ı mezkûrdan ihrâca tasaddî etmemek üzere mezbûr Ahmed Ağa dahi beher mâh yüz para îcâre-i merkūmeyi edâda rencîde etmemek üzere tarefeynden her biri ta‘ahhüd edip bu vechile kat‘-ı münâza‘a eylediklerini mevlânâ-yı mezbûr mahallinde ba‘de’t-tahrîr ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri tescîl ve huzûr-ı âlîlerine i‘lâm olundu. Fî-12 M sene [1]217