İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 279 Hüküm no: 310 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın, Paşalı Mehmed b. Mustafa aleyhine açtığı kefalet davasını ispat edemediğinden muarazadan men edildiği Mu‘ârazadan men‘ Ma‘rûz Derûn-ı arzuhâlde mezkûretü’l-ism mu‘arrefetü’z-zât Emine bt. Mustafa nâm Hatun Çarşamba günü dîvân-ı âlide ve ba‘dehû du‘âhânemizde ma‘kūd meclis-i şer‘-i enverde sâhib-i arzuhâl Esirci Paşalı Mehmed b. Mustafa mahzarında yedimde olan bin iki yüz senesi Zilka‘desi târihiyle muvarrah bir kıt‘a deyn temessükü nâtık olduğu üzere gāib ani’l-meclis Çerkes Ahmed Ağa zimmetinde alacak hakkım olan üç yüz otuz guruşa merkūm Mehmed târih-i mezbûrda tarefeynden bi’l-emr ve’l-kabûl kefîl ve zâmin olup lâkin ben târih-i mezbûrdan beri Âsitâne-i aliyyeye müddet-i sefer ba‘îd olan ve diyâr-ı âharda olup benim işbu târihe gelince da‘vâ mümkün olmamışdı el-hâletü hâzihi zafer bulmamla meblağ-ı mezbûr üç yüz otuz guruşu bi-hükmi’l-kefâle merkūm Mehmed’den hâlâ taleb ederim deyü ba‘de’d-da‘vâ ve’l-inkâr müdde‘iye-i mezbûre ber-vech-i muharrer müdde‘âsına şâhid olmak üzere ikāme eylediği üç nefer kimesne edâ-yı şehâdet-i şer‘iyye edememeleriyle makbûle olmayıp şâhid-i âdil dahi ikāme edememekle müdde‘âsını isbâtdan izhâr-ı acz edip bi’s-sulb mezbûr Mehmed gıbbe’t-tahlîfü’ş-şer‘î mûcebiyle müdde‘iye-i mezbûre da‘vâ-yı mezkûresiyle merkūm Mehmed’e bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-21 M sene [1]217