İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 280 Hüküm no: 311 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime bt. Mustafa’nın, kocası Mehmed Esad b. Osman’dan muhâlaa yoluyla boşandığı Muhâla‘a Ma‘rûz Derûn-ı arzuhâlde mezkûretü’l-ism mu‘arrefetü’z-zât Kerîme bt. Mustafa nâm Hatun meclis-i şer‘-i münîrde hâlâ damadı sâhib-i arzuhâl Mehmed Esad b. Osman mahzarında mezbûr Osman hâzır olduğu hâlde takrîr-i kelâm edip işbu hâzırate bi’l-meclis mümeyyize olan sadriye sagīre kızım Hibetullah’ın eb ve cedden biri ve benden gayrı velîsi olmamağla kızım hâzıra-i mezbûreyi târih-i i‘lâmdan yedi ay mukaddem yüz otuz guruş mehr-i müeccel-i misli ile şuhûd mahzarlarında mezbûr Mehmed Esad bi’l-velâye tezvîc ol dahi tezevvüc ve kabûl ve duhûl edip lâkin beynlerinde münâferet-i küllî vâkı‘a olmağla eğer kızım hâzıra-i mezbûre ba‘de’l-bülûğ mehr-i mezkûrunu da‘vâ ve şer‘an bir nesne ahz eder ise mikdâr-ı me’hûzuna ben kefîl ve zâmine olmak üzere kızım hâzıra-i mezbûrenin mehr-i müecceli ve nafaka iddeti üzerlerine olmak üzere zevci merkūm Mehmed Esad ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezbûru ba‘de’l-kabûl malımdan merkūm Mehmed Esad’ın menzilinde kalıp iddi‘â eylediğim bir ferâce ve bir makreme ve sekiz uçkur ve beş kat câmeşûy ve altı çevre ve üç yağlık ve iki boğça ve bir şalvar ve bir âyîne ve bir silecek ve bir peştemâl ve bir tahta pabucu ve bir mikrâsdan meccânen fâriğa olmamla eşyâ-i mezbûreye ve beynimizde cereyân eden ahz u i‘tâya müte‘allika âmme-i da‘vâdan ben merkūm Esad ve babası hâzır-ı merkūm Osman’dan her birinin zimmetlerini ibrâ-yı âm ile bi’l-asâle ibrâ ve iskāt eylediğimde merkūm Mehmed Esad ve babası merkūm Osman dahi hukūk-ı zevciyete ve kezâlik beynimizde cereyân eden hukūka müte‘allika âmme-i da‘vâdan [42b] benim ve kızım hâzıra-i mezbûrenin zimmetimizi ibrâ-yı âm ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü takrîrini merkūm Mehmed Esad ve babası merkūmdan her biri tasdîk edip bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-19 min-M sene 1217