İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 282 Hüküm no: 313 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvadar v. Onan’ın, Kasımpaşa’daki değirmen ve fırınını Kigork ve Donik’e sattığı Değirmen ve fırın mübâya‘ası Ma‘rûz Mahrûse-i Galata’ya muzâfe kasaba-i Kasımpaşa’da Acıçeşme nâm mahalde kâin döğücü değirmeni demekle ma‘rûf dört horoslu bir bâb uncu ve ekmekçi değirmeni derûnunda mevcûde beyne’l-esnâf gedik tâ‘bir olunur on altı re’s bârgir ve değirmen-i mezkûra merbût Acıçeşme’de bir bâb ekmekçi fırını derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmede on iki re’s bârgir hisseye mâlik olan değirmenci Asvadar v. Onan nâm zimmî meclis-i şer‘-i münîrde işbu bâ‘iseyi’l-i‘lâm Kigork v. Ohan ve Donik v. Agob nâm zimmîler muvâcehelerinde takrîr-i kelâm edip ber-vech-i muharrer mâlik olduğum on iki bârgir hissemi tarefeynden icâb ve kabûlü hâvi bey‘-i kat‘î ve bi-safkatin vâhidetin mersûmân Kigork ve Donik zimmîlere dokuz bin on altı guruşa bey‘ ve temlîk ve vech-i lâyıkı üzere teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl edip semeni olan meblağ-ı mezkûrun dört bin sekiz yüz on sekiz guruşunu cânib-i mîrîye olan ol mikdâr deynim için işbu târihden beher mâh seksener guruş vermek üzere cânib-i mîrîye ve dört bin yüz doksan sekiz guruşunu dahi ma‘lûmü’l-esâmî tüccâra olan ol miktâr deynim için hâzır bi’l-meclis ekmekçiler kethüdâsı el-Hâc Abdi Ağa ma‘rifetiyle beher mâh ellişer guruş vermek üzere tamamen edâya mersûmâna emr eylediğimde onlar dahi kabûl ve ber-vech-i muharrer edâya ta‘ahhüd etmeleriyle mebî‘-i mezkûrun tağrîr ve gabnine müte‘allika âmme-i da‘vâdan dahi tarefeynden her birimiz âharın zimmetini kabûlü hâvi ibrâ ve iskāt etmemizle fîmâ ba‘d hisse-i mezkûrede benim alâka ve medhalim kalmayıp mersûmân Kigork ve Donik zimmîlerin mülk-i müşterâları olmuşdur dediğini mersûmân ba‘de’t-tasdîk zikr olunan on iki bârgir ve sâir âlât-ı lâzıme-i ma‘lûme mersûmân Kigork ve Donik zimmîlerin mülk-i müşterâları olmak üzere Başmuhâsebe’ye kayd ve yedlerine sûret i‘tâ buyrulması için emr-i âlîleri sudûru niyâzında oldukları İslâmbol Mahkemesi’nden huzûr-ı âlîlerine i‘lâm olundu. Fî-14 min-Muharrem sene 1217