İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 282 Hüküm no: 314 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Mustafa’nın, Şerife Mihriban’ın evine verdiği zararı tazmin etmesi gerektiği Keşif Ma‘rûz Sâdır olan fermân-ı âlîlerine imtisâlen kıbel-i şer‘den mürsel kâtib-i sâni Merhabâzâde Mahmud Efendi hâssa mi‘mârı hulefâsından İsmail ve Hâfız Mehmed Halîfeler ile İstanbul’da Kumkapı hâricinde Cerrah İshak Mahallesinde vâki‘ nezâret-i dâ‘îlerinde olan evkāfdan sâbıkā Mekke-i Mükerreme Kādısı Süleyman Efendi vakfından Ali Efendi’nin mutasarrıf olduğu menzile varıp huzûr-ı Müslimînde ba‘de akdi’l-meclis sâhibe-i arzuhâl mu‘arrefetü’z-zât Şerîfe Mihriban bt. es-Seyyid Veliyüddin nâm Hatun vakf-ı mezbûr mütevellîsi es-Seyyid Ârif Efendi b. es-Seyyid Mehmed tarafından vekîl-i şer‘îsi câbi-i vakıf Abdülkerim Efendi b. el-Hâc Abdullah hâzır olduğu hâlde meclis-i ma‘kūd-ı mezkûrda derûn-ı arzuhâlde ismi mezkûr mezbûr Ali Efendi b. Mustafa mahzarında mezbûr Ali Efendi’nin bu esnâda hedm ve binâ eylediği işbu derûnunda akd-i meclis olunan menzilinin muhdes sofasından ve tahta pûşûndan benim makarr-ı nisvân olan mahallerine nezâret ve zarar-ı mübeyyeni olmağla men‘ ü def‘ olunmak matlûbumdur deyü da‘vâ ettikde mi‘marân-ı mezbûrân Müslimûn-ı hâzirûn ile ba‘de’l-keşf ve’l-mu‘âyene mezbûr Ali Efendi’nin zikr olunan sofasından ve tahta-pûşûndan nezâret ve zarar-ı mübeyyeni olduğunu ba‘de’l-mu‘âyene mezbûr Ali Efendi mevcûd matbah üzerine alt başı üç buçuk zirâ‘ ve üst başı iki zirâ‘ tûlen dört zirâ‘ muhkem tahta havâle ve mevcûd tahtapûşînin kafesine kadden nısf zirâ‘ tahta kaplayıp müdde‘iye-i mezbûrenin nezâret ve zarar-ı mübeyyenini def‘a mezbûr Ali Efendi ta‘ahhüd ve bu vechile kat‘-ı nizâ‘ eylediklerini Mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eyledikleri İslâmbol Mahkemesi’nden huzûr-ı âlîlerine i‘lâm olundu. Fî-16 M sene 1217