İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 303 Hüküm no: 337 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakine Hatun bt. Ahmed ile boşandığı kocası Tatar Mustafa b. İbrahim’in birbirlerinin zimmetlerini ibrâ ettikleri Muhâla‘a Ma‘rûz Derûn-ı arzuhâlde mezkûretü’l-ism mu‘arrefetü’z-zât Sakine Hatun bt. el-Hâc Ahmed bi’t-terâzi meclis-i şer‘-i enverde mezbûre Sakine Hatun’un vâlidesi mu‘arrefetü’z-zât Şerîfe Fâtıma bt. es-Seyyid Mehmed nâm Hatun ile karındaşı sâhib-i arzuhâl es-Seyyid el-Hâc Mehmed Emin Efendi ve mezbûr Mehmed Efendi’nin zevcesi kezâlik mu‘arrefetü’z-zât Nesibe bt. Ali hâzır oldukları hâlde hâlâ zevci Tatar Mustafa b. İbrahim tarafından husûs-ı âtîde vekîl olduğu Mehmed Emin Çelebi b. Mustafa ve İbrahim Efendi b. Ahmed şehâdetleriyle sâbit olan es-Seyyid Mehmed Efendi b. es-Seyyid Ahmed mahzarında müvekkil-i mezbûr Tatar Mustafa zevc-i dâhilim olup lâkin işbu meclis-i şer‘de vekîl-i merkūm es-Seyyid Mehmed Efendi müvekkil-i zevcim mezbûr Tatar [47b] Mustafa’ya izâfetle bi’l-vekâle beni tatlîk etmekle zimmetinde mütekarrir ve ma‘kūdun aleyh olan yüz yirmi beş guruş mehr-i müeccelim ile nafaka-i iddet-i ma‘lûmem ve meûnet-i süknâm mukābelelerinde bi’t-terâzi ta‘yîn olunan yirmi guruş ki cem‘an yüz kırk beş guruşu bana işbu meclis-i şer‘de ve vâlidem hâzıra-i mezbûrenin bâ-hüccet-i şer‘iyye mülk-i müşterâsı olup müvekkil-i mezbûr Tatar Mustafa’nın menzilinde olan eşyâ-i ma‘lûmeyi menzil-i mezbûrda vekîl-i mezbûr bi-aynihî vâlidem hâzıra-i mezbûreye def‘ ve teslîm ve her birimiz ahz u kabz edip ben hukūk-ı zevciyete ve vâlidem hâzıra-imezbûre dahi eşyâ-i mezbûreye ve karındaşım hâzır-ı mezbûrun zevcesi hâzıra-i mezbûre Nesibe dahi mevekkil-i mezbûr Tatar Mustafa beni bi-gayrı hakkın darbedip darb-ı mezbûrdan nâşî zevcim hâzır-ı mezbûrun firâşından hâsıl müstebînü’l-hilka iskāt-ı cenin etmemle mûceb-i şer‘îsini taleb ederiz deyü zevci karındaşım hâzır-ı mezbûr ile ma‘an tasaddî eyledikleri da‘vâlarından meccânen fâriğler olmağla zevcân-ı hâzırân-ı mezbûrân dahi cinâyet-i merkūmeye ve işbu târih-i i‘lâma gelince sâire müte‘allika âmme-i da‘vâdan <> cümlemiz müvekkil-i mezbûr Tatar Mustafa’nın zimmetini ibrâ-yı âmm-ı râfi‘u’l-hısâm ile ibrâ ve iskāt eylediğimizde vekîl-i merkūm dahi hukūk-ı zevciyete ve kezâlik işbu târih-i i‘lâma gelince sâire müte‘allika âmme-i da‘vâdan benimle hâzirûn-ı mezbûrûn es-Seyyid el-Hâc Mehmed Emin ve Şerîfe Fâtıma ve Nesibe Hatunlardan her birimizin zimmetlerimizi müvekkil-i mezbûra izâfetle bi’l-vekâle ibrâ ve iskāt ve tarefeynden her birimiz âharın ber-vech-i muharrer ibrâsını bi’l-asâle ve bi’l-vekâle kabûl eyledik deyü mukırra-i mezbûrenin ikrâr u i‘tirâfını vekîl-i mezbûr ve hâzirûn-ı merkūmundan her biri tasdîk ve hâzirûn-ı merkūmun Şerîfe Fâtıma ve Nesibe ve el-Hâc Mehmed Emin’den her biri dahi ber-vech-i muharrer âmme-i da‘vâdan ibrâ eylediklerini ikrâr u i‘tirâf eyledikleri İslâmbol Mahkemesi’nden huzûr-ı âlîlerine i‘lâm olundu. Fî-12 min-S sene 1217