İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 302 Hüküm no: 336 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paskal v. Zafiri’nin, Bakkal Dimitri v. Angeli’ye olan borcunu ödemesi gerektiği 325 guruş hüküm Ma‘rûz Bâ‘isü’l-i‘lâm Bakkāl Dimitri v. Angeli zimmî meclis-i şer‘-i enverde bakkāl tâifesinden Paskal v. Zafiri zimmî muvâcehesinde gāib ani’l-meclis Pano nâm-ı diğer Dimitri zimmî İslâmbol’da Tahtakale’de çiçekçi dükkânı demekle arîf bir bâb bakkāl dükkânı derûnunda mevcûde beyne’l-esnâf gedik tâ‘bir olunur âlât-ı lâzımenin yüz yirmi sehmden mâlik olduğu otuz sehm hisse-i şâyi‘asını târih-i i‘lâmdan yedi gün mukaddem huzûr-ı şer‘de mersûm Paskal zimmîye bi-safkatin vâhidetin üç yüz yirmi beş guruşa bey‘ ve temlîk ve lâyıkı üzere teslîm edip semeni olan meblağ-ı mezbûr üç yüz yirmi beş guruşu henüz kabz etmeksizin tamamen müşteri-i mersûm Paskal zimmî yedinden ahz u kabz eyledim deyü kâziben ikrâr edip ol vechile semen-i merkūm üç yüz yirmi beş guruş mersûm Paskal zimmînin zimmetinde olmağla mersûm Pano nâm-ı diğer Dimitri zimmî semen-i merkūmu mesfûr Paskal zimmîden taleb ve da‘vâ ve ahz ve kabza ve lede’l-kabz ma‘lûmü’l-esâmî tüccâra olan deynini edâya tarefeynden beni tevkîl ben dahi kabûl etmemle meblağ-ı mezbûr üç yüz yirmi beş guruşu mersûm Paskal zimmîden bi’l-vekâle taleb ederim deyü da‘vâ ettikde mersûm Paskal zimmî cevâbında vech-i meşrûh üzere dükkân-ı mezkûr derûnunda otuz sehm âlât-ı mezkûreyi müvekkil-i mersûm Pano nâm-ı diğer Dimitri zimmîden üç yüz yirmi beş guruşa iştirâ ve kabz ve meblağ-ı mezbûr zimmetinde el-yevm deyni olduğunu ikrâr lâkin mersûm Nikola zimmînin ber-vech-i muharrer vekâletini inkârından mâ‘adâ ben ber-vech-i muharrer iştirâ eylediğime nâdim olmuşdum deyü îrad eylediği bâtıl kelâmına iltifât olunmamağla mersûm Nikola zimmîden ber-vech-i muharrer vekâlet müdde‘âsını lede’t-tezkiye makbuli’ş-şehâde idükleri ihbâr olunan Foti v. Dimitri ve Yorgi v. Rodo şehâdetleriyle ber-nehc-i şer‘î muvâcehesinde isbât etmeğin mûcebiyle meblağ-ı mezbûr üç yüz yirmi beş guruşu vekîl-i mersûm Nikola zimmîye edâ ve teslîme mersûm Paskal zimmîye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-9 min-S sene 1217