İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 305 Hüküm no: 339 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu İbrahim’in sel baskınıyla zayi olan sabunları tekrar imaline ruhsat verilmesi Sabun maddesi Ma‘rûz Sâdır olan fermân-ı âlîşâna imtisâlen işbu arzuhâle nazar olundukda sâhib-i arzuhâl el-Hâc İbrahim’in şerîkleri medîne-i İzmir’den ibâdullâha bey‘ olunmak için irsâl eyledikleri a‘lâ kantar İzmir sabunu İslâmbol’da Balıkpazarı kapısı ile Zindânkapısı beyninde vâki‘ mağazada iken bundan akdem vukū‘ bulan bârânda sel basıp hâr-ı hâşâka mahlût ve fenâ-pezîr ve tekrar i‘mâle muhtâc idüğü müstebân ve zikr olunan sabunun keyfiyeti suâl olundukda fi’l-hakīka vech-i muharrer olup bir vechile isti‘mâl olunmayıp bu sûretde telef ve zâyi‘ olunacağı ve medîne-i İzmir’den tekrar i‘mâl olunmağa muhtâc olduğunu sabuncular kethüdâsı el-Hâc Ali Ağa ve Girid tüccârından han ağası Hüseyin Ağa ve damadı Mehmed Ağa ve el-Hâc Ali ve Yeğenoğlu el-Hâc Mehmed nâm kimesnelerden her biri ihbâr ve ba‘de’l-i‘mâl merkūm el-Hâc İbrahim Âsitâne-i aliyyeye celb edeceğine dahi mezbûrûndan her biri tekeffül etmeleriyle sâhib-i arzuhâl-i merkūma vech-i meşrûh üzere izin ve ruhsat verilmek iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-13 min-S sene 1217