İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 306 Hüküm no: 340 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Yavan’ın, Rüstempaşa vakfından icareli oda ve dükkânlarını Karyana bt. Kazer’e devrettiği Sultan odalarında iki bâb oda mübâya‘ası Ma‘rûz İslâmbol’da Kumkapı kurbünde Balipaşa Mahallesinde mütemekkin Arakil v. Yuvan nâm zimmî meclis-i şer‘-i şerîf-i enverde bâ‘isetü’l-i‘lâm Karyana bt. Kazer nâm Nasrâniye tarafından husûs-ı âtîde tasdîka vekîl olan damadı Sahak v. Serkiz nâm zimmî muvâcehesinde takrîr-i kelâm edip İslâmbol’da Mahmudpaşa Câmi‘-i şerîfi kurbünde müteveffâ Rüstempaşa Evkāf-ı şerîfi musakkafâtından sultan odaları demekle arîf bir bâb hân derûnunda kâin fevkānî ve tahtânî altmış bir bâb oda ve kahve ve hân-ı mezkûr dâhilinde kapı arasında kâin iki bâb dükkânlar ve hân-ı merkūmdan olmak üzere hân-ı mezkûr hâricinde altı bâb dükkânlar derûnlarında mevcûde gedik tâ‘bir olunur işbu bir kıt‘a [48a] fermân-ı âlîşân mantûkunca mülk-i müşterâm olan âlât-ı lâzıme-i ma‘lûmelerden hân-ı merkūmda fevkānîsinde sağ tarafda onuncu oda ve sol tarafında üçüncü odanın gedikleri olan âlât-ı lâzıme-i ma‘lûmelerimi tarefeynden bi’l-icâb ve’l-kabûl müvekkile-i mesfûre Karyana Nasrâniyeye bi-safkatin vâhidetin altı yüz guruş semen-i makbûza bâtten ve sahîhan bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra mebî‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini ibrâ ve iskāt ve her birimiz ber-minvâl-i muharrer âharın ibrâsını kabûl edip zikr olunan gedik tâ‘bir olunur âlât-ı lâzıme-i ma‘lûmelerde benim aslan ve kat‘an alâka ve medhalim kalmayıp müvekkile-i mesfûre Karyana Nasrâniyenin mülk-i müşterâsı ve hakk-ı sırfı olmuşdur dedikde mersûm Sahak zimmî ba‘de’t-tasdîk zikr olunan iki bâb odaların gedik tâ‘bir olunur âlât-ı lâzıme-i ma‘lûmeleri mersûm Arakil üzerinden ref‘ ve terkīn ve müvekkile-i mezbûre Karyana Nasrâniye üzerine Başmuhâsebe’ye kayd ve emr-i âlî-i mezkûrun ihrâc olunup yedine sûret i‘tâ buyrulmasını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-15 S sene 1217