İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 320 Hüküm no: 359 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. İbrahim ve Zeliha hatun’un, Hoca Gıyaseddin Mahallesi imamı Mehmed Efendi b. Mustafa hakkındaki şikâyetlerinden vazgeçtikleri İmâmı ta‘zîrden ibrâ Ma‘rûz İslâmbol’da Hoca Gıyaseddin Mahallesi’nde sâkineler Şehsuvarzâde mu‘tekası Zeliha Hatun ve hürresi Hanife bt. İbrahim nâm Hatun taraflarından husûs-ı âti’l-beyânda vekîlleri olduğu zâtlarını ârifân es-Seyyid Mustafa Ağa b. el-Hâc İbrahim ve Mehmed Ağa b. Ahmed şehâdetleriyle sâbit olan Süleyman Beşe b. Hüseyin nâm kimesneler meclis-i şer‘-i enverde mahalle-i mezbûre İmâmı es-Seyyid Mehmed Efendi b. Mustafa muvâcehesinde mezbûr es-Seyyid Mehmed Efendi müvekkiletân-ı mezbûretânın mahalle-i mezbûrede sâkine oldukları menzilleri kapısına târih-i i‘lâm gecesi sa‘at üçte iken kolluk neferâtıyla gelip menzillerinin kapısını küşâd ve menzil-i mezbûra duhûl edip ol vechile müvekkiletân-ı mezbûretâna âr lâhık olmağla mûceb-i şer‘îsini taleb ederiz deyü bundan akdem da‘vâ ve müdde‘âlarını isbât ve mûcebiyle merkūm es-Seyyid Mehmed Efendi’ye şer‘an ta‘zîr lâzım gelmişdi el-hâletü hâzihi müvekkiletân-ı mezbûretân hakk-ı ta‘zîr da‘vâlarından meccânen fâriğalar olup husûs-ı mezkûra müte‘allika âmme-i da‘vâdan merkūm es-Seyyid Mehmed Efendi’nin zimmetini kabûlünü hâvi ibrâ ve iskāt edip bu vechile kat‘-ı nizâ‘ eylediler deyü vekîl-i mezbûrun ikrârını merkūm Mehmed Efendi tasdîk eylediği tescîl ve İstanbul Mahkemesi’nden huzûr-ı âlîlerine i‘lâm olundu. Fî-27 min-S sene 1217