İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 320 Hüküm no: 358 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Gıyaseddin cami-i şerifi imamı Mehmed b. Mustafa’nın azliyle yerine Halil Efendi b. Mehmed’in tayin edildiği İmâm azli ve ihrâcı Ma‘rûz İslâmbol’da Ağakapısı kurbünde merhûm Hoca Gıyaseddin Mahallesi ahâlîsinden Yamak Mehmed Ağa ve el-Hâc Ahmed ve el-Hâc Mehmed ve es-Seyyid Mustafa ve Süleyman Ağa ve Derviş el-Hâc Mehmed Esad Ağa ve Halil Ağa ve el-Hâc Süleyman Ağa ve Yorgancı İbrahim Ağa vesâirleri meclis-i şer‘-i enverde merhûm-ı mezbûr Hoca Gıyaseddin câmi‘-i şerîfinde imâm olan es-Seyyid Mehmed b. Mustafa muvâcehesinde mezbûr es-Seyyid Mehmed mahallemiz imâmı olup edâ-yı hizmet eylediğinden mâ‘adâ mezbûr da‘vâlara vekâlet ve şehâdet etmeği kendine kâr ittihâz ve âhar gûnâ fısk u fücûr edip dâimâ sekrânü’l-hâl olmağla ol vechile mezbûrun imâmetinden cümlemiz istikrâh eylediğimizden gayrı azli dahi lâzım gelmekle azl buyrulmak murâdımızdır deyü muvâcehesinde mezbûr es-Seyyid Mehmed’in iktidâya münâfi sû-i hâlini ihbâr eylediklerinde mezbûr es-Seyyid Mehmed dahi imâmet-i mezkûreyi hüsn-i rızâsıyla ahâlî-i mahalle-i mezbûrenin muhtarları olup her vechile ehil ve müstehık olduğu ihbâr olunan lede’l-imtihan istihkākı nümâyân işbu hâzır bi’l-meclis Halil Efendi b. Mehmed’e ferağ ve kasr-ı yed ve fîmâ ba‘d mahalle-i mezbûreye varmayıp ve umûrlarına kat‘an müdâhale etmeyip kendi ırzıyla mukayyed olmak üzere ta‘ahhüd eylediğinde merkūm Halil Efendi dahi imâmet-i mezkûreyi kabûl ve ahâlî-i mahalle-i mezbûre dahi iştikâlarından fâriğler olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-27 min-S sene 1217