İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 322 Hüküm no: 361 Orijinal metin no: [51a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Ayvaz’ın, Rüstempaşa vakfından icareli iki bab dükkânını Mehmed b. Mahmud’a devrettiği Han odası mübâya‘ası Ma‘rûz İslâmbol’da Kumkapı kurbünde Balipaşa Mahallesi’nde mütemekkin Arakil v. Ayvaz nâm zimmî meclis-i şer‘-i enverde bâ‘isü’l-i‘lâm es-Seyyid Mehmed b. Mahmud muvâcehesinde İslâmbol’da Mahmudpaşa Câmi‘-i şerîfi kurbünde merhûm Rüstempaşa Evkāf-ı şerîfi musakkafâtından sultan odaları demekle arîf bir bâb hân derûnunda kâin fevkānî ve tahtânî altmış bir bâb oda ve kahvehâne ve hân-ı mezkûr dâhilinde kapı arasında kâin iki bâb dükkânlar ve hân-ı merkūmdan olmak üzere hân-ı mezkûr hâricinde kâin altı bâb dekâkîn derûnlarında mevcûde gedik tâ‘bir olunur işbu bir kıt‘a fermân-ı âlî mantûkunca mülk-i müşterâm olan âlât-ı lâzıme-i ma‘lûmelerden hân-ı mezkûrun fevkānîsinde sol tarafda sekizinci odada kâin gedik tâ‘bir olunur âlât-ı lâzıme-i ma‘lûmelerimi tarefeynden bi’l-icâb ve’l-kabûl bi-safkatin vâhidetin merkūm es-Seyyid Mehmed’e yedi yüz elli guruş semen-i makbûz mukābelesinde bâten ve sahîhan bey‘ ve temlîk ve teslîm eylediğimde ol dahi ber-vech-i muharrer iştirâ ve tesellüm ve kabz ve kabûl eylediğinden sonra mebî‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini kabûlünü hâvi ibrâ ve iskāt edip ba‘de’l-yevm zikr olunan sekizinci oda derûnunda mevcûde gedik tâ‘bir olunan âlât-ı lâzıme-i ma‘lûmelerde benim aslan ve kat‘an alâka ve medhalim kalmayıp merkūm es-Seyyid Mehmed’in mülk-i müşterâsı ve hakk-ı sırfı olmuşdur dedikde merkūm es-Seyyid Mehmed dahi ba‘de’t-tasdîk zikr olunan âlât-ı lâzıme-i ma‘lûmeler merkūm Arakil zimmînin üzerinden ref‘ ve terkīn ve merkūm es-Seyyid Mehmed üzerine mülkü olmak üzere Başmuhâsebe’ye kayd ve emr-i âlî-i mezkûrdan ihrâc olunup yedine sûret i‘tâ buyrulmasını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-2 min-Rebî‘ülevvel sene 1217