İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 322 Hüküm no: 362 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu esnafından Malkon’un, nizama aykırı hareket etmeyeceğini taahhüt etmesi Çubukçu esnâfının ta‘ahhüdü Ma‘rûz Âsitâne-i aliyyede vâki‘ çubukçu esnâfının kethüdâsı Ebûbekir Ağa ve mütevellî es-Seyyid el-Hâc Mehmed Emin ve Ellialtı Halil ve el-Hâc Hasan ve Mustafa ve Ali ve es-Seyyid Hasan ve Ahmed ve Şahbazoğlu Hasan ve Hacı Bekir ve zimmî ustalarından Kirkor ve Artin ve Agob ve Oseb ve Varteres ve Yahûdi ustalarından David ve Yako ve Küçük Yako vesâirleri meclis-i şer‘-i enverde esnâf-ı mezkûreden Malkon zimmî muvâcehesinde mersûm Malkon esnâfımızdan olup lâkin işbu yedimizde olan bir kıt‘a fermân-ı âlîşân nâtık olduğu üzere taşradan Âsitâne-i aliyyeye gelen çubuk ve imâme kethüdâ ve ustalarımız ma‘rifetiyle bi’t-terâzi kat‘-ı fiyat ve bi’l-cümle esnâfın ma‘lûmları olarak Âsitâne-i aliyye ve Bilâd-ı selâsede vâki‘ cem‘an yüz elli aded mu‘teber başmuhâsebede mukayyed gedik ashâbı beynlerinde alâ-merâtibihim tevzî‘ ve taksîm olunup eğer kable kat‘i’l-fiyat esnâf-ı mezkûreden biri hufyyeten çubukçu esnâfına mahsûs olan envâ‘-ı çubuğu Pazar ve iştirâ eder olur ise Müslim ise kalebend ve zimmî ve Yahûdi ise vaz‘-ı kürek-birle tedîb olunmak şürût-ı nizâmımızdan olup ve nizâm-ı mezkûr düstûrü’l-amel iken merkūm Malkon zimmî bu esnâda kable kat‘i’l-fiyat hilâf-ı emr-i âlî çubuk iştirâ ve hilâf-ı şürût-ı nizâm hareket ve tarafımızı ihtilâle bâdi olmağla tedîb olunması murâdımızdır deyü iştikâ ve takrîrlerine mutâbık bir kıt‘a fermân-ı âlîşân ibrâz ettiklerinde mersûm Malkon zimmî mazmûn-ı fermân-ı âlîşânı tasdîk ve ber-vech-i muharrer hilâf-ı emr-i âlîşân hareket eylediğini inkârından mâ‘adâ fîmâ ba‘d dahi fermân-ı âlîşânın hâvi olduğu bi’l-cümle şürût üzere hareket ve esnâf-ı mezkûreye itâ‘at ve hilâfına hareket eder ise esnâf-ı mezkûreden ihrâc ile tedîb olunmasına râzı oldukda esnâf-ı mezkûre dahi ber-vech-i muharrer şikâyetlerini tehîr eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurre-i Rebî‘ülevvel sene 1217