İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 365 Hüküm no: 421 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Süleyman b. İsmail’in, Ali b. Ahmed aleyhine açtığı tarla nizaı davasının reddedildiği Tarla nizâ‘ı mu‘ârazadan men‘ Ma‘rûz Derûn-ı arzuhâlde mezkûrü’l-ism Bostanî Süleyman b. İsmail Çarşamba günü dîvân-ı âsafânelerinde ma‘kūd meclis-i şer‘-i enverde sâhib-i arzuhâl Ali b. Ahmed muvâcehesinde Anadolu’da Boyabad kazâsına tâbi‘ Bayburd karyesinde vâki‘ dokuz kıt‘a arazi-i mîriyeden tarlayı mezbûr Ali bir buçuk sene mukaddem dâim kızından bâ-ma‘rifet-i sâhib-i arz tefevvüz edip lâkin mücerred fâriğa-i mezbûre dâim kızı olduğuna binâen zikr olunan tarlalara ben şefî‘ olmamla zikr olunan tarlaları bâ-ma‘rifet-i sâhib-i arz bana fâriğ olmak üzere merkūm Ali’ye cebr olunsun deyü takrîr-i meşrûhu üzere tasaddî eylediği da‘vâsı meşrû‘a olmamağla kelâmına iltifât olunmayıp da‘vâ-yı mezkûresiyle merkūm Ali’ye bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min-Rebî‘ülâhire sene [1]217