İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 365 Hüküm no: 422 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hüseyin b. Mehmed’den intikal eden menzilin oğlu Mehmed ve kızı Sâliha Hatun’a ait olduğu Menzilden ihrâc Ma‘rûz İstanbul’da Sultan Mehmed kurbünde Mimarsinan Mahallesinde sâkin iken işbu târih-i i‘lâmdan üç buçuk ay mukaddem vefât eden Sucukçu el-Hâc Hüseyin b. Mehmed b. Abdullah’ın sulbî kebîr oğlu Alemdâr el-Hâc Mehmed kendiden asâleten ve âhar sulbî oğlu Hâfız Hüseyin tarafından dahi husûs-ı âtîde vekîli olmağla vekâleten ve sulbî kebîre kızı mu‘arrefetü’z-zât Sâliha Hatun dahi asâleten her biri meclis-i şer‘-i enverde zikri âtî menzile vaz‘-ı yedi mütehakkıka olan müteveffâ-i mezbûrun zevcesi kezâlik mu‘arrefetü’z-zât Şerîfe Âişe bt. Mehmed nâm Hatun mahzarında İstanbul’da Hâfız Paşa kurbünde Mimarsinan Mahallesinde kâin bir tarafdan kafesçi dükkânı ve bir tarafdan câmi‘-i şerîf medresesi ve bir tarafdan Bey Mescid-i şerîfi ve bir tarafdan tarîk-i âm ile mahdûd fevkānî bir bâb odayı müştemil bir bâb menzil işbu yedimizde olup târih-i i‘lâm senesi Saferi’l-hayrın on altıncı günü târihiyle muvarrah bir kıt‘a i‘lâm-ı şer‘î nâtık olduğu üzere arsa ve ebniyesi merhûm Haydar Efendi Vakfı musakkafâtından olup babamız müteveffâ-i mezbûrun bâ-temessük-ı mütevellî tasarrufunda iken islâsen bize intikāl eylediğini mezbûre Şerîfe Âişe Hatun muvâcehesinde şuhûd-ı udûlle isbât ve mûcebiyle menzil-i mezbûrdan keff-i yedine tenbîh olunmuşken mezbûre Şerîfe Âişe Hatun menzil-i mezbûru bize teslîmden imtina‘ etmekle suâl olunup menzil-i mezbûru ba‘de’t-tahliyye bize teslîme mezbûre Şerîfe Âişe Hatun’a tenbîh olunmak murâdımızdır deyü takrîr-i meşrûhlarına mutâbık bir kıt‘a i‘lâm-ı şer‘î ibrazıyla da‘vâ etdiklerinde ol dahi cevâbında mütde‘iyân-ı mezbûrânın ber-vech-i muharrer müdde‘âlarını ikrâr u i‘tirâf edip lâkin mezbûrânın ibrâz eyledikleri i‘lâm-ı mezkûrda muharrer olan şâhidleri yalan şâhidi olmağla tekrar isbât eylesinler demesi meşrû‘a olmamağla kelâmına iltifât olunmayıp mûcebiyle menzil-i mezbûru ba‘de’t-tahliyye müdde‘iyân-ı asîl ve vekîl-i mezbûrân Alemdâr el-Hâc Mehmed ve Sâliha’ya teslîme merkūme Şerîfe Âişe Hatun’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-min-Rebî‘ülâhire sene [1]217 Ma‘rûz Beyaz